Valdete Daka: Nuk ka zgjedhje veresie!
Kryetarja e KQZ të Kosovës, Valdete Daka ka ngritur shqetësimin për mosndarjen e buxhetit nga ana e Qeverisë për Komisionin Qendror të Zgjedhjeve, komision ky që tashmë është autorizuar nga presidenti Hashim Thaçi, për organizimin e zgjedhjeve të parakohshme të shpallura për datën 6 tetor.
Valdete Daka tha për Televizionin publik të Kosovës, RTK, se pavarësisht kërkesës që i kanë dërguar Qeverisë për ndarjen e mjeteve në vlerë prej afër 6 milionë eurosh, Qeveria ende nuk i është përgjigjur kësaj kërkese.
Si rjedhojë, sipas Dakës, KQZ nuk mund të nis asnjë proces të përgatitjes së zgjedhjeve, sidomos kur bëhet fjalë për proceset të cilat kërkojnë procese tenderuese, deri në momentin që nuk ndahen mjetet.
E vonesat për ndarjen e këtyre mjeteve, sipas kryetares së KQZ-së, mund të ndikojnë direkt në kualitetin e procesit zgjedhor. Për më tepër, Daka ka bërë të ditur se sot do të duhej të nisnin një pjesë e procedurave tenderuese të parapara në planin për organizimin e zgjedhjeve, por që sipas saj, asgjë nuk mund të nis pasi siç është shprehur ajo, “nuk ka zgjedhje veresie”.
