Valdrin Pjetri iku! A do të dekretojë zgjedhjet e reja në Shkodër, sqaron Presidenti…

Presidenti i Republikës sot ishte i prerë se pas dorëheqjes së kryetarit të dal nga zgjedhjet e 30 Qershorit, Valdrin Pjetri, nuk do të dekretojë përsëritjen e zgjedhjeve për Bashkinë Shkodër.

Sipas Ligjit për Pushtetin Vendor, sqaroi Ilir Meta për A2, Bashkia e Shkodrës do të vazhdojë të drejtohet nga kryetarja aktuale, Voltana Ademi.

“Nuk ka nevojë, zgjedhjet janë më 13 Tetor për gjithë Shqipërinë, përfshirë edhe Shkodrën, këto janë të vetmet zgjedhje të ligjshme përpara. Deri në marrjen e detyrës nga kryetari i ri, detyrën e mban kryetari që është në detyrë.”

Rasti i Valdrin Pjetrit, tha Presidenti, tregoi se duhet një hetim i thelluar mbi funksionimin e institucioneve shqiptare.

“Problemi nuk është i personit në fjalë, sepse ai edhe pse ka bërë një shkelje të ligjit ka pasur një bashkëpunim të shkëlqyer me Policinë italiane në rastin konkret. Problemi është kapja e institucioneve që nuk kanë bërë punën e tyre, për të verifikuar shkeljen e ligjit në rastin në fjalë,” u shpreh Meta duke përfunduar:

“Fakti që personi ka pasur edhe detyra të mëparshme dhe certifikata të sigurisë të nivelit të lartë, për shkak të detyrave, tregon se duhet të bëhet një hetim me i thelluar për funksionimin e institucioneve të pavarura të shtetit që verifikojnë integritetin e të gjithë zyrtarëve tanë.”