Valët e Adriatikut e kthjellojnë, Edi Rama: Dera e BE mund të mbyllet prapë!

Fillimisht e nisi fushatën për zgedhjen e 11 Majit duke thënë se vendin mund ta anëtarsoj në Bashkimin Evropian vetëm ai sepse e dinë se si, dje tha se nëse ai jo – këtë do ta bëjë një Kryeministër tjetër i Partisë Socialiste, dhe sot në Durrës kur kandidatët për deputetë socialist po prisnin të lumtur se do t’ju thotë që Shqipërinë në BE do ta anëtarësoj Zaho, Kryeministri Edi Rama siç duket i kthjelluar nga valët e Detit Adriatik, me plotë sinqeritet i ankoruar në molin durrsak e pranoi se dera e BE edhe mund të mbyllet prap!

“Siç ka ndryshuar pozitivisht qasja e BE për zgjerimin mund të ndryshojë edhe negativisht. Ata mund të fillojnë sërish atë historinë ‘business as usual’. Në këtë moment dera është e hapur dhe ne duhet të shpejtojmë për t’u futur para se të mbyllet prapë. Ne nuk e dimë si do jetë impakti i mbylljes së luftës në Ukrainë. Ne jemi forca e vetme sot që mund ta çojë përpara këtë proces.

Mund të ketë 1000 gjëra që mund të mos i pëlqehen, por kjo parti është në vendin dhe kohën e duhur dhe nuk lëviz dot. Ka rëndësi a shprehet vullneti i popullit në mënyrë të fuqishme apo krijohet një lëkundje. Një lëkundje na prish gjithë procesin e negociatave. Shpresa ime është që në 12 dhe 13 maj do të bëjmë numërimin e votave dhe ata që merren me negociatat me BE nuk do të kenë asnjë lloj shqetësimi,” tha Edi Rama para kandidatëve për deputetë të PS në Qarkun Durrës që nuk po kuptonin asgjë pasi po ju fliste një njeri që me Këshillin Bashkiak të Fierit bllokoi integrimin e Shqipërisë në BE!

Por, pak rëndësi ka për Partinë pse ata nuk po kuptojnë, dhe, lideri u tha se duhet të jenë krenarë për angazhimin që ka ndërmarrë qeveria për të sjellë përpara drejtësisë ata që janë përgjegjës për veprime të paligjshme edhe pse në mesin e tyre janë ata që deri dje ishin pjesë e kësaj kaste Xhep m’Xhep dhe sot është në duar të drejtësisë.

“Ne duhet të jemi krenarë, jo kokulur, për faktin, që përtej dhimbjes personale për arsye njerëzore se nuk na vjen mirë të shohim dikë që deri dje ka qenë mes nesh, ndërsa sot është në duart e drejtësisë. Por ama nuk ndodhte kjo kurrë nëse nuk do e kishim hapur ne këtë kapak.”

Për fat të durrsakëve dhe vetë Detit Adriatik ky takim i pakuptimtë nuk zgjati shumë dhe që të gjithë i shpëtuan ndotjes, edhe ata që Edi Rama kishte përballë dhe po rrezikonin nofullën për shkak të buzëqeshjes së dhunshme.