Varianti Delta, Studimi: Risku nga hospitalizimi dy herë më i madh

Risku nga hospitalizimi për shkak të infeksionit me variantin Delta të COVID-19 është dy herë më i madh se në rastin e infektimit me variantin Alfa, thuhet në studimin e shkencëtarëve nga Universiteti Cambridge dhe Agjencia e shëndetit publik të Anglisë pas analizës së 40 mijë rasteve me COVID-19 nga fundi i marsit deri në fund të majit të vitit 2021.

Rezultatet e publikuara dje në revistën shkencore Lancet Infectious Diseases, kryesisht kanë të bëjnë me të pavaksinuarit, e për ata me vaksinim të plotë nuk u arrit të nxirren konkluzione nga të dhënat e analizuara.

Vetëm 1.8% ishin plotësisht të vaksinuar

Deri më tani studimet kryesisht kanë treguar se vairanti Delta është më infektues, por nuk kishte të dhëna bindëse mbi riskun e variantit të rëndë të COVID-19.

Shkencëtarët kanë konstatuar se risku i hospitalizimit mesatarisht është 2.26 herë më i madh tek varianti Delta.

Nga 40 mijë raste të studimit, vetëm 1.8 për qind ishin plotësisht të vaksinuar, që studiuesit e interpretojnë si konfirmim të efikasitetit të madh të vaksinës.

Nga të infektuarit që u përfshinë në studim, 74 për qind prej tyre ishin të pavaksinuar e 24 për qind pjesërisht të vaksinuar.

“Analiza jonë thekson se në mungesë të vaksinimit çdo epidemi e Deltës do të imponoj ngarkesë më të madhe për sistemin shëndetësorë se sa epidemia e Alfas,” tha njëra prej autoreve të studimit, Anne Presanis nga Universiteti Cambridge duke shtuar:

“Vaksinimi i plotë është vendimtar për uljen e riskut individual nga infeksioni simptomatik me Delta, që është po aq i rëndësishëm, për uljen e rrezikut nga sëmundja e rëndë dhe pranimin në spital të pacientit të infektuar me Delta.”

Varianti Delta, i cili fillimisht u identifikua në Indi, tani është dominues në shumë shtete ndërsa ekspertët presin se ai do të dominoj ndaj varianteve tjera në nivel global, vetëm në rast se nuk paraqitet ndonjë variant edhe më infektues.