Varrimi i Kaçifas/ ndalohen 4 grekë, policia kthen furgonin me mbështetës të Agimit të Artë

Sot i jepet lamturmira e fundit 35-vjeçarit Kostandinos Kaçifas, i cili u vra nga forcat RENEA 12 ditë më parë.

Siç ishte paralajmëruar, 8 autobusët e parë nga Greqia që do të marrin pjesë në ceremoninë e varrimit kanë mbërritur në Bularat.

Mediat greke kanë raportuar se më shumë se 2000 shtetas grekë pritet të mblidhen në fshatin Bularat.

Raportohet se policia shqiptare ka shoqëruar 4 persona, pasi mbanin në makinë simbole antishqiptare. Po ashtu ka kthyer një furgon me mbështetës të Agimit të Artë dhe dhjetëra persona me simbole dhe flamuj grekë, të cilët tentuan të hynin në territorin shqiptar me makina të vogla.

Policia shqiptare, thuhet në njoftimin zyrtar, po bashkëpunon me atë greke për të parandaluar ndonjë incident të mundshëm. Po ashtu policia po vëzhgon dhe po mban nën mbikqyrje persona me precedent penal, kryesisht ata të Agimit të Artë.

Athina zyrtare apel shtetasve grekë: Tregoni respekt

Ministria e Punëve të Jashtme dhe Mbrojtjes së Qytetarëve u ka bërë thirrje shtetasve grekëve që kanë shkuar në fshatin Bularat për të marrë pjesë në varrimin e ekstremistit grek Konstantinos Kaçifas që të
tregojnë vetëpërmbajtje dhe respekt.

“Shtetasit grekë që shkojnë në Bularat janë të lutur që të vetëpërmbahen dhe të tregojnë respekt për familjen dhe ceremoninë”.

Ndryshe, trupi i pajetë i  Kaçifas, cili u vra para 12 ditësh nga RENEA mbërriti në fshatin Bularat pasditen e ditës së djeshme.

Përcjellja drejt banesës së fundit e 35-vjeçarit do të bëhet sot në orën 13:00 në fshatin Bularat, ndërsa prezent do të jenë edhe forcat e policisë.