Vazhdojnë hetimet për rastin “Brezovica”

Prokuroria Themelore në Ferizaj ka njofuar sot se ka filluar një aksion në disa qytete të Kosovës, në kuadër të hetimeve lidhur me rastin “Brezovica”.

“Gjatë këtij aksioni, janë kontrolluar dhe bastisur disa autosallone, shtëpi dhe lokale përcjellëse në lokacione të ndryshme,” thekson Prokuroria përmes një komunikate.

Aksioni, raporton RFE, është zhvilluar në qytetin e Prishtinës, Ferizajit, Vushtrrisë dhe Lipjanit, për shkak të dyshimit të veprave penale “Fajdeja”, “Shmangia nga tatimi” dhe “Detyrimi”.

Aksionet për rastin “Brezovica”, kanë nisur qysh në fund të vitit të 2021.

Deri më tash janë hetuar mbi 100 persona, përfshirë zyrtarë të Ministrisë se Mjedisit dhe Planifikimit Hapësinor, zyrtarë komunalë dhe pronarë të kompanive private.

Në hetim për këtë rast aktualisht janë edhe 40 persona.

Kompleksi turistik “Brezovica” që gjendet në Komunën e Shtërpcës, dhe konsiderohet një prej qendrave më të mëdha të turizmit dimëror në Kosovë.

Sipas prokurorisë, raporton RFE, nga viti 2013 deri në vitin 2022, në këtë qendër janë ndërtuar më shumë se 100 objekte në mënyrë të jashtëligjshme.

Për ndërtimin e tyre, prokuroria ka thënë se janë dhënë më shumë se 2 milionë euro ryshfet.