Vazhdon mashtrimi me testimet, PD: Ministrja trefishoi gënjeshtrën!

Prej ditësh tashmë, e sidomos pas premtimit të ministres së Shëndetësisë, Ogerta Manastirliu, se do dyfishohej numri i tamponëve, vijon të thellohet terri informativ rreth numrit të tyre ditor, thekson Partia Demokratike duke akuzuar ministren përmes Ish-Deputetit Bardh Spahia, se vetëm gënjeshtrën ka trefishuar.

“Në fakt, ministrja ka trefishuar gënjeshtrën e vet dhe e bën çdo ditë përmes raportimit ditor! Jep një shifër totale të testimeve të kryer, pa specifikuar se sa janë tamponë për raste të dyshuara, pra ajo që sipas protokollit quhet gjurmim dhe sa është numri i tamponëve që bëhen me kërkesë të qytetarëve për nevoja të tyre udhëtimi e emigracioni. Sa nga ajo shifër e përgjithshme që jep ministria janë teste serologjike?” thekson Dr.Bardh Spahia duke akuzuar ministren Ogerta Manastirliu se asnjë informacion të tillë nuk e ndanëme publikun, por jepet një shifër përgjithësuese, që natyrisht është pak më e lartë, sesa shifrat në kohën kur shteti kishte monopolin e kryerjes së tamponëve!

“Tek ajo shifër, përfshihen edhe tamponët e kryer në privat, shumica nga emigrantët dhe këtë ministria e shëndetësisë nuk e thotë! Sepse vijon e njëjta strategji, që prej ditës së parë: mashtrimi i opinionit publik përmes fshehjes së realitetit!”

Është skandaloze kokëfortësia për të mos rritur numrin e testimeve, si një mënyrë për t’u lehtësuar punën mjekëve, për të kryer protokollin bazë, gjurmimin e për patur kontroll mbi Covid-19, vlerëson Ish-Deputeti i Partisë Demokratike duke përfunduar:

“Si asnjë homolog i tij në botë, Edi Rama i ka braktisur qytetarët e vet në këtë periudhë të vështirë pandemie dhe me mungesat kaq evidente, zgjedh mashtrimin, në vend të rritjes së buxhetit për shëndetësinë!”