Vdekja e 26 vjeçarit në karantinë, ministri Vitia: Të mos paragjykohet rasti!

I riu nga Gjilani që ndërroi jetë pasditen e së dielës pasi kishte kërcyer në rrethana ende të panjohura nga kati i katërt i konvikteve në Qendrën e Studentëve në Prishtinë ku ishte vendosur në karantinë, nuk kishte paraqitur asnjë dokument që dëshmonte për ndonjë problem shëndetësor.

Këtë e bëri të ditur sot Sekretari i Përgjithshëm i Ministrisë së Shëndetësisë, Naim Bardiqi, duke cituar dhe raportin e mjekut në hyrje të Aeroportit të Prishtinës, ku i ndjeri ka mohuar të ketë ndonjë sëmundje tjetër.

“Në raportin të cilin e ka kontrolluar ekipi shëndetësor në hyrje në Aeroportin Ndërkombëtar të Prishtinës të gjitha pyetjet gjatë të dhënëve nga i ndjeri janë mohuar d.m.th nuk ka pasur asnjë shënim për asnjë sëmundje nga mjeku i cili e ka kontrolluar të ndjerin,” tha Bardiqi duke sqaruar se bazuar në rekomandimet e IKSHPK, vetëm disa kategori e personave dërgohen në vetëizolim në shtëpitë e tyre dhe jo në Qendrën e Studentëve e cila po shërben si karantinë.

“Personat me probleme shëndetësore duke përfshirë edhe sëmundjet kronike; Personat e moshës mbi 70 vjeç; Fëmijët nën 18 vjeç që janë pa shoqërim të prindërve si dhe profesionistët që do të jenë në shërbim të parandalimit dhe luftimit të COVID-19 si mjekët, policët dhe pjesëtarët e FSK-së.”

Ndërsa, vet ministri i Shëndetësisë, Arben Vitia, duke i shprehur ngushëllime familjes për vdekjen e 26-vjeçarit, tha se si institucion, nuk mund t’i lejojnë vetes të flasim për gjëra të pavërtetuara dhe nuk mund të paragjykojmë asnjë element të rastit.

Ai u zotua me këtë rast se nga Ministria e Shëndetësisë dhe Qeveria, do të ushtrohen të gjitha përgjegjësitë institucionale ndërsa ftoi Prokurorinë të vendosë në prioritetet e saj hetimin e plotë të rastit.

“Do të zbardhet në detaje çdo e dhënë që lidhet me rastin. Prej aranzhimit të udhëtimit nga Ambasada e Kosovës në Gjermani, pritjes e vizitës mjekësore në Aeroport dhe shoqërimit në Qendrën e Studentëve. Pra, duke filluar prej Ambasadës së Kosovës në Berlin e deri te stafi administrues i Qendrës së Studentëve. Shfrytëzoj rastin t’i bëj thirrje Prokurorisë së shtetit të vendosë në prioritetet e saj hetimin e plotë të rastit. Çdo supozim i parakohshëm që ne mund të bëjmë tani, do të ishte mungesë përgjegjësie, do të ishte shtim i dhimbjes për familjen,” tha ministri Arben Vitia ndërsa e pranoi se e kishte menduar edhe dorëheqjen, por tashmë si ministër ka përgjegjësinë që të zbardhë të gjithë rastin.