Vdekja e ushtarakut në Afganistan, Ministria e Mbrojtjes: Me Komandën e Operacionit, hetim të plotë

Ministria e Mbrojtjes dhe Shtabi i Përgjithshëm i Forcave të Armatosura shprehen se po bashkëpunojnë me Komandën e Operacionit në Afganistan për hetimin e plotë të rrethanave të vdekjes së ushtarakut shqiptar.

Ministria e Mbrojtjes përmes një njoftimi thekson se dje në orën 22:40, në Afganistan ka humbur jetën ushtaraku me inicialet XH. J.

Autoritetet e Ministrisë së Mbrojtjes dhe Shtabit të Përgjithshëm të FA po bashkëpunojnë me Komandën e Operacionit për të bërë hetimin e plotë të rrethanave në të cilat ka ndodhur ngjarja.

Ministri i Mbrojtjes dhe Shefi i Shtabit të Përgjithshëm të FA sigurojnë personelin në mision dhe familjet e tyre se do vijojnë të mbështesin e t’u gjenden pranë për të përmbushur me sukses misionin, shprehet ministria duke përfunduar:

Ministria e Mbrojtjes, Shtabi i Përgjithshëm dhe gjithë personeli i Forcave të Armatosura i shprehin ngushëllimet më të ndjera familjes për ndarjen e parakohshme nga jeta të njeriut tyre të dashur.