Vdekje misterioze e 32 vjeçarit në Komisariatin 3, Berisha: Vrasje shtetërore e banditëve të Edi Ramës
Pas vdekjes misterioze të 32-vjeçarit Lear Kurti mbrëmjen e së mërkurës në ambientet e Komisariatit nr. 3, ka reaguar Kryetari i Partisë Demokratike, Sali Berisha, duke e cilësuar si vrasje të shëmtuar shtetërore të banditëve të Edi Ramës!
“Ky është një krim, një vrasje shtetërore e shëmtuar e banditëve të Edi Ramës dhe ministrit të tij të familjes. Me këtë rast unë i shpreh ngushëllimet më të ndjera familjes së të ndjerit dhe dënoj këtë akt kriminal të përsëritur të vrasësve me uniformë për të cilët nuk ekziston asnjë lloj norme ligji apo morali.
Është akti i disatë që banditët me uniformë marrin jetë të rinjsh në rrugë e komisariat, është dëshmi tjetër që qeveria udhëhiqet nga një bandë. U bëj thirrje të rinjve të ngrihen fuqishëm në një protestë të madhe kundër kësaj vrasjeje mizore e me torturë. E kanë vdekur në makinë e kanë çuar të vdekur në spital, dhe refuzojnë e të mbajnë një minutë heshtje, edhe ky është një akt i shëmtuar, tha Sali Berisha duke mos i konsideruar rastësi:
“Nuk janë rastësi këto përsëritje periodike, policia embushur me vrasës dhe trafikantë, me patronazhistë kriminelë. Po të marrësh harkun kohor 18 mujor ka më shumë vrasje se në SHBA dhe Europë të mara së bashku, ndaj protesta është e vetmja rrugë. Sot është protesta kombëtare e universiteteve, jam në mbështetjre të plotë.”
Ndryshe, rreth orës 23:07 të mbrëmjes së të mërkurës, Patrulla e Përgjithshme e Komisariatit të Policisë Nr. 3 Tiranë, kanë konstatuar në rrugën “Riza Cuka” një shtetas të cilit i kanë bërë thirrje për të ndaluar me qëllim për t’i kontrolluar dokumentet e identifikimit.
Ky shtetas, 32-vjeçari Lear Kurti, sipas Agjencisë së Mbikëqyrjes Policore, tentoi të largohej, por u kap më pas. AMP thekson se nën drejtimin e Prokurorisë ka ngritur menjëherë grupin hetimor, i cili po kryen veprimet e para hetimore për sqarimin e plotë të rrethanave të ngjarjes.
Gjithashtu po kryhen ekzaminimet mjeko-ligjore për përcaktimin e shkakut te vdekjes dhe në përfundim AMP do të dalë me një njoftim përfundimtar për shtyp.
Informacion paraprak i Agjencisë së Mbikëqyrjes Policore (AMP)
Më datë 19.10.2022, rreth orës 23:07, Patrulla e Përgjithshme e Komisariatit të Policisë Nr. 3 Tiranë, gjatë kontrollit të territorit, kanë konstatuar në rrugën “Riza Cuka” një shtetas të cilit i kanë bërë thirrje për të ndaluar me qëllim për t’i kontrolluar dokumentat e identifikimit.
Sapo patrulla i kërkoi për të paraqitur dokumentat e identifikimit, shtetasi L.K., 32 vjeç është larguar me vrap. Punonjësit e policisë janë vënë në ndjekje dhe kanë arritur ta ndalojnë në rrugën “Don Bosko”, duke kryer më pas edhe shoqërimin e tij në ambientet e Komisariatit të Policisë Nr. 3 në Tiranë.
Gjatë shoqërimit të tij, ky shtetas ka shfaqur probleme shendetësore sapo ka mbërritur në ambientet e Komisariatit. Menjëherë është kërkuar ndihma e shërbimit të Urgjencës dhe për shkak se situata shëndetësore e tij është rënduar, ky shtetas është dërguar me mjetet e Policisë në Spitalin e Traumës, ku edhe ka ndërruar jetë.
Agjencia e Mbikëqyrjes Policore, nën drejtimin e Prokurorisë ka ngritur menjëherë grupin hetimor, i cili po kryen veprimet e para hetimore për sqarimin e plotë të rrethanave të ngjarjes.
Gjithashtu, aktualisht po kryhen ekzaminimet mjeko-ligjore për përcaktimin e shkakut te vdekjes dhe në përfundim AMP do të dalë me një njoftim përfundimtar për shtyp.
