Vdes mjeku i spitalit në Omsk ku është trajtuar Navalny

Një mjek në spitalin Omsk, ku është trajtuar politikani opozitar rus Aleksei Navalny, menjëherë pas helmimit me agjent nervor, është raportuar i vdekur, tha sot Ministria e Shëndetësisë për atë rajon.

Sergei Maksimishin, 55-vjeç, i cili ishte Zv/Shef për anesteziologji dhe reanimacion në spitalin e Omskut, ka vdekur nga sulmi në zemër, ka thënë kjo ministria për Open Media.

Navalny ka qenë duke u trajtuar në departamentin e njëjtë pasi ishte helmuar në muajin gusht.

Spitali tha se Maksimishin ka vdekur papritur, raporton CNN.

Megjithatë nuk janë bërë të ditura detajet e vdekjes.

Navalny, 44-vjeç, ishte pranuar në spital në departamentin për helmim në spitalin e Omskut, pasi ishte sëmurë gjatë një fluturimi nga Tomsku në Moskë.

Navalny më pas ishte vënë në komë të induktur dhe ishte evakuuar në Gjermani, ku ka kaluar pesë muaj për shërim nga helmimi.

Testimet në Evropë kanë vërtetur se ai është helmuar me agjent nervor të familjes Noviçok.

Maksimishin nuk pati dhënë detaje për gjendjen e Navalnyt atëbotë.

Në fillim, mjekët patën thënë se shkaku i sëmurjes së Navalnyt ka qenë helmimi, mirëpo më vonë kanë mohuar këtë gjë.

Pas kthimit në Rusi muajin e kaluar, raporton RFE, Navalny është ndaluar, dhe këtë javë është dënuar me gati tri vjet burgim për shkelje të dënimit me kusht për një dënim paraprak. Burgosja e tij është dënuar në rrafsh ndërkombëtar, duke përfshirë reagimet nga Bashkimi Evropian dhe Shtetet e Bashkuara.