Vdiq Vettingu, Rroftë Vettingu!
nga Agim Popoci
Le Roi mort, vive le Roi! Kjo shprehje u përdor në vitin 1422 kur u shpall vdekja e mbretit Charles VI dhe u shpall automatikisht Charles VII për mbretin e Anglisë. Ngjashmëria e Vettingut në Drejtësi me Vetttingun e prokurorit tashmë të shkarkuar Ramadan Troci, si me mbretin në fjalë ashtu edhe shprehjen, është frikshme!
Charles VI u bë mbret kur ishte vetëm 11 vjeç. KPK nuk është sikur ky mbreti 11 vjeçar, është edhe më keq, por të themi mund të bëjë punë sa një mbret 11 vjeçar. Dhe, Vettingun, jo vetëm Ramadan Trocit, i bëjnë personazhe që nuk kanë jo 11 vjet por as 11 ditë përvojë në gjyqësor. I tillë është rasti me prokurorin në fjalë. Por, ja që ky është Vettingu në Drejtësi, që është miratuar nga 140 deputetët e mjerë të Parlamentit të Shqipërisë.
Të vetmen fatkeqësi që sot po e vuan Reforma në Drejtësi dhe sistemi i drejtësisë shqiptare për dallim nga Charles VI është se deri në moshën e pjekurisë punët e Mbretit i bënte xhaxhai i tij, Philipi, ndërkohë Vettngun në KPK vazhdojnë ta bëjnë kalamajtë e drejtësisë. Kjo është dhe arsyeja pse kemi vendime të turpshme si ky i Ramadan Trocit që Vettingun e asfiksojnë në çast, dhe e bëjnë të vdekur.
Dhe, Charles VI u çmend në moshën 36 vjeçare ndërkohë KPK u dorëzua shumë shpejtë! Këtë e dëshmon jo vetëm rasti në fjalë, që mjafton për të sqaruar se si është degraduar Vettingu dhe situata është e pashpresë.
Çdo qytetar normal i këtij vendi kur e pa prokurorin Ramadan Trocin në stolin e KPK-së, pa i ditur bëmat e çështjeve në Dibër, mendja i shkoj tek dy çështje mjaft të ndjeshme ku vuri dorë prokurori Troci dhe u trondit opinioni publik, por në fund fare edhe vetë shteti, i cili pësoi dëm shumë të madh material: rastet me Guvernatorin Ardian Fullani dhe kryetarin e Bashkisë së Vlorës, Shpëtim Gjika! Komisioni i Pavarur i Kualifikimit, KPK, vendosi shkarkimin nga detyra të Ramadan Troci, me detyrë prokuror në Prokurorinë e Përgjithshme, por arsyetimi i këtij vendimi e lë të vdekur Vettingun në Drejtësi, dhe popullin e bënë të pashpresë se në fund, kjo KPK, do të filtroj sistemin e drejtësisë duke na lënë diçka që do ti shërbej shoqërisë shqiptare. Pse?!
Arrestimi i Guvernatorit Ardian Fullani nuk ishte një arrestim i zakonshëm i një fermeri në një fshat të humbur të Shqipërisë, por ishte arrestimi i personit më të përfolur dhe njërit ndër më të fuqishmit në vend. Dhe, mënyra e arrestimit ishte makabre, ordinere, dhe skajshmërisht jo profesionale. U përfol si arrestim me urdhër politik, dhe fatkeqësisht kishte po atë epilog! E gjithë kjo bujë, i gjithë ky arrestim përfundoi me dëmshpërblimin e Ardian Fullanit, ose dëmit shtetëror që i bëri Ramadan Troci kësaj Shqipërie të varfër. Dhe jo vetëm kaq!
Ky njeri guxoi të fut duart edhe në lojën politike në mes Edi Ramës dhe kryetarit, të fuqishëm, siç quhej, dhe rezultoi i tillë, të bashkisë së Vlorës, Shpëtim Gjika. Edhe Gjikës, Ramadan Troci i vuri prangat dhe pse dihej se për shumë arsye ishte i fuqishëm. Në fund, vetëm Ramadan Troci nuk doli i humbur. Si Shpëtim Gjika që u degjenerua në sy të opinionit ashtu edhe buxheti i shtetit, me qindëra seanca gjyqësore, pësuan një goditje shumë të rëndë.
Po çfarë thotë Komisioni i Pavarur i Kualifikimit me vendimin Nr. 77 të datës 15.11.2018 për prokurorin Ramadan Troci.
Analiza e gjetjeve të Trupit gjykues të Komisionit të Pavarur të Kualifikimit, kryesuar nga Genta Tafa (Bungo), anëtare Suela Zhegu dhe relatore Pamela Qirko, në prani edhe të vëzhguesit ndërkombëtar, Elka Ermenkova, u referohet të dhënave të nxjerra nga 3 (tre) grupet e burimeve të informacionit: (i) formularit të vetëvlerësimit dhe dokumentacionit të paraqitur nga vetë subjekti; (ii) 5 dosjeve të analizuara të përzgjedhura me short; dhe (iii) të dhënat nga burimet arkivore në sektorin e Burimeve Njerëzore pranë Prokurorisë së Përgjithshme.
U hetuan denoncimet e depozituara nga publiku, pranë KPK, u vlerësuan disa dosje të hetuara nga subjekti i rivlerësimit dhe gjetja nga analiza e dosjeve të vendimeve të mosfillimit dhe pushimit të procedimit penal.
Sot Ramadan Troci nuk është prokuror, por a ishte ky qëllimi i Reformës në Drejtësi që nuk mori asnjë votë kundër në Parlament: që të shkarkoj prokuror për të punësuar prokuror të rinj, apo të pastrohet sistemi i drejtësisë nga prokurorë dhe gjyqtarë që marrin lekë dhe urdhra politikë!
Nga arsyetimi i këtij vendimi, as njëra dhe as tjetra nuk bëhet e qartë. Madje dy rastet më të bujshme për të cilat edhe u bë i njohur prokurori Ramadan Troci, Fullani dhe Gjika, nuk u prekën fare. Pse?!
KPK shkarkoi Ramadan Trocin por nuk bëri Vetting. Bëri Vetting politik ose në rastin më të mirë Vetting social, duke i lënë vendin bosh ca juristëve të rinj që janë të papunë!
KPK shkarkoi Ramadan Trocin pa sqaruar nëse Fullani dhe Gjika u arrestuan me urdhër politik ose kishin shkelur ligjin siç pretendonte Troci kur ju vuri prangat. Sikur KPK të bënte detyrën dhe të kishim një Vetting të Ramadan Trocit, atëherë në burg do të ktheheshin Ardian Fullani dhe Shpëtim Gjika, gjyqtarët që bënë nul faktet e prokurorit Troci me të cilat ai ju vuri prangat për herë të parë, do të pushtonin një qeli pranë tyre, ndërsa dëmshpërblimi i dhënë për pafajësi do të kthehej në buxhetin e shtetit.
Ose, sikur KPK të bënte detyrën dhe të kishim një Vetting të Ramadan Trocit, Ardian Fullani dhe Shpëtim Gjika do të vazhdonin ta shijonin lirinë e tyre të mohuar nga Troci, dhe në pranga do të përfundonin ata që i dhanë urdhër Trocit për të prangosur njerëz të pafajshëm, vetë prokurori Troci dhe në fund Prokurorja e Përkohshme e Përgjithshme, Arta Marka që gradoi Ramadan Trocin si prokuror në Prokurorinë e Përgjithshme.
Në fund fare, sot Ramadan Troci nuk është prokuror, por nëse ky është qëllimi i Vettingutt të atyre 140 deputetëve që i dhanë votën, atëherë lirshëm mund të konstatohet se Vettingu në Drejtësi ka vdekur. Dhe, me të drejtë, të gjithë deputetët që i dhanë votën, të gjithë politikanët që u dhanë urdhra prokurorëve dhe gjyqtarëve, dhe të gjithë prokruorët që do ti nënshtrohen këtij lloj Vettingu në të ardhmen, me të drejtë mund të brohorasin: Rroftë Vettingu!
