Veliaj: Basha mori makinë 130.000 € nga një kontraktor; PD e padit për shpifje!

Dhe deri sa Kryetari i Bashkisë Tiranë, Erion Veliaj, vazhdon sulmet ndaj opozitës si drejtues i fushatës elektorale të PS, Partia Demokratike është e vendosur të mos tolerojë më asnjë nga akuzat e Veliajt. Mësohet se Erion Veliaj është kallëzuar për shpifje, për herë të dytë brenda një jave.

Burime nga Gjykata e Tiranës bëjnë të ditur se bëhet fjalë për akuza të reja të Kryetarit të Bashkisë Tiranë.

Erion Veliaj tha se “disponon prova që Lulzim Basha mori një makinë 130 mijë euro nga një prej kontraktorëve për të lënë protestën tek Astiri”. Pjesë e fushatës denigruese për të dëmtuar imazhin e kreut të opozitës- siç thuhet në padi, janë edhe akuzat e Veliajt se “PD është një çetë që vë gjoba dhe që u bie biznesmenëve për të marrë një vilë apo një makinë”.

Për këto akuza, kërkohet nga gjykata dënimin i Erion Veliajt për shpifjet e përsëritura kundër Kryetarit të PD, Lulzim Basha, me qëllim dëmtimin e imazhit dhe përfitimin në zgjedhjet e ardhshme.

“Këto të pavërteta janë bërë me qëllim dëmtimin e reputacionit dhe dëmtimin e imazhit në mënyrë të qëllimshme, duke qenë se Lulzim Basha është Kryetar i PD në opozitë dhe Erion Veliaj, si drejtues i fushatës zgjedhore të PS për qarkun e Tiranës, këto deklarime shpifëse i përdor për të përfituar kredo politike përballë qytetarëve, si për vete dhe për PS,” thuhet në kallëzimin e ri penal, të ngritur për shpifje nga Partia Demokratike kundër Kryetarit të Bashkisë Tiranë, Erion Veliaj.