Vëllai i arrestohet për drogë, pezullohet shefi i Rrugores në Dibër, Robert Aga

Pas arrestimit të Pajtim Agës gjatë një operacioni antidrogë ku në prangat e policisë përfunduan dhe 7 të tjerë, sot është pezullua nga detyra shefi i Qarkullimit Rrugor në Dibër, Robert Aga.

Robert Aga është bërë i njohur për opinionin publik nga “Dosja 184”, pas përgjimeve të publikuara nga gazeta gjerman “Bild” për blerjen e votave në bashkinë e Peshkopisë, ku Aga dëgjohet duke folur me ish-ministrin Damian Gjiknuri, Ulsi Manjën, Xhemail Qefalinë dhe ish-ministrin e Brendshëm, Saimir Tahirin të cilit i thoshte se është dhe “ushtari tij”.

Ndryshe, pas përfundimit të operacionit anti-drogë, sot Policia e Shtetit doli me një deklaratë zyrtare ku thuhet se midis të arrestuarve është edhe P. A., 51 vjeç, banues tek ish-stacioni i Trenit, Tiranë, i dënuar më parë për veprën penale “Prodhimi dhe shitja e narkotikeve” kryer në bashkëpunim.

Pajtim Aga njihet si biznesmen në qarkun e Dibrës, ku prej disa vitesh ka hapur një televizion kabllor, ndërsa problemet e tij me policisë janë të hershme.

Më 25 shtator 2016, Pajtim Aga, u arrestua nga Policia e Lezhës pasi iu gjetën 320 gramë kokainë.

Dy vite më vonë, në 2018-n, Aga humbi në mënyrë misterioze të birin, Mateon. 21-vjeçari u zhduk pa lënë gjurmë nga fshati Maqellarë, pak kilometra nga qyteti i Peshkopisë. Familjarët thanë në atë kohë djali mund të jetë rrëmbyer dhe që prej atij momenti nuk dihet asgjë për fatin e tij.