Vëllai i Oliver Ivanoviçit të vrarë: I habitur! Si e fshehë Serbia, Radoiçiqin!

“Është mirë që është shpallur fletarresti ndaj Millan Radoiçiqit dhe që ekziston vullneti i organeve të Kosovës, por pa presionin e komunitetit ndërkombëtar ajo nuk do të mund të realizohet, meqë sjellja e organeve serbe në këtë rast deri tash ka qenë e papranueshme,” tha për të përditshmen serbe “Danas”, Mirosllav Ivanoviç, vëllai i liderit të vrarë të nismës qytetare Liri, Demokraci, Drejtësi, SPD nga Kosova, Oliver Ivanoviç.

Duke komentuar lajmin e mediave të Prishtinës, sipas të cilave Prokuroria Speciale e Kosovës ka lëshuar urdhërarrest ndërkombëtar ndaj nënkryetarit të Listës Serbe, Millan Radoiçiqit, të dyshuar për pjesëmarrje në vrasjen e Oliver Ivanoviçit, kjo Prokurori ka shfaqur dyshimin se ai po fshihet në Serbi.

Citohet ndër të tjera deklarata e prokurorit special Sylë Hoxha dhënë “Kohës ditore”, sipas të cilës Radoiçiq dyshohet se ka ndihmuar dhe se ka organizuar grupin për vrasjen e Ivanoviqit, por edhe për krim të organizuar dhe trafikim droge.

Hoxha po ashtu citohet të ketë thënë se është shpallur urdhërarrest i brendshëm edhe ndaj Zvonko Veselinoviçit, një biznesmen nga veriu i Kosovës, i cili nuk dyshohet për rastin e vrasjes së Ivanoviqit, por dikush tjetër, si dhe për krim të organizuar.

“Danas” ndërkaq rikujton se meqë Kosova nuk është anëtare e Interpolit ajo nuk ka të drejtë të shpallë fletarrest ndërkombëtar drejtpërdrejtë, por këtë procedurë duhet ta zhvillojë UNMIK-u, i cili ende funksionon në Kosovë.

Portali në gjuhën serbe që funksionon në veri të Mitrovicës, KoSSev citon zëdhënësen e UNMIK-ut, sipas të cilit e gjithë procedura që po zhvillohet në lidhje me rastet e tilla është tepër sekrete dhe se nuk mund të japë informacione, raporton KTV.

Ndërkohë mediat në Beograd kanë regjistruar praninë e Radoiçiqitnë disa evente publike dhe tubime politike në Beograd. Presidenti i Serbisë, Aleksandar Vuçiç pohon se Radoiçiqi është intervistuar nga MUP-i i Serbisë , se ka kaluar nëpër testin e poligrafit dhe ka rezultuar i pafajshëm në rastin e vrasjes së Ivanoviçit.

Mirosllav Ivanoviç,shprehet se autoritetet e Serbisë me këtë kanë dëshmuar që në fillim qëndrimin e tyre ndaj gjithë këtij rasti dhe se prej tyre atni nuk pret ndihmë për zgjidhjen e rastit.

“Ata kanë dëshmuar qëndrimin e tyre duke paragjykuar rrjedhën e gjerave dhe duke insistuar në pafajësinë absolute të Radoiçiqit. Kjo mund të ndodhë edhe tani në lidhje me urdhërarrestin, por ekziston këmbëngulësia dhe vullneti i autoriteteve të Kosovës dhe pres se do të pasojë presioni i Perëndimit që hetimi të marrë zgjidhje.

Ka edhe akuza të tjera kundër Radoiçiqit, por për bazueshmërinë e tyre nuk mund të flas, por fakti se ka dyshime të tilla është argument shtesë se sjellja e autoriteteve të Serbisë është e papranueshme. Deri me tash nuk kam parë që pushteti të mbrojë dikë që është i dyshuar për vepra serioze penale”, citon KoSSevi Mirosllav Ivanoviçin.

Ndryshe, Mirosllav Ivanoviç është një gjykatës i vjetër i Gjykatës së Qarkut në Mitrovicë dhe në shërbim të regjimit të Millosheviçit i cili njihet me vendimet e tij ekstreme ndaj shqiptarëve, dhe njëri ndër bajraktarët antishqiptarë në Mitrovicë dhe jo vetëm.