Vendimet e qeverisë/ Pagë minimale çdo muaj për naftëtarët e Rafinerisë së Ballshit

Gjatë gjithë vitit 2022, qeveria shqiptare ka vendosur të shpërblejë me pagë minimale çdo muaj gjithë naftëtarët dhe ish-naftëtarët e Rafinerisë së Ballshit.

Ministrja e Financave dhe Ekonomisë, Delina Ibrahimaj, u bëri thirrje të gjithë naftëtarëve dhe ish-naftëtarëve, që të paraqesin dokumentet e nevojshme pranë zyrave të punës.

“Sot në mbledhjen e Këshillit të Ministrave miratuam një vendim shumë të rëndësishëm, që ka të bëjë mbështetjen sociale të qeverisë shqiptare për punonjësit dhe ish-punonjësit e rafinerisë së naftës në Ballsh. Sipas këtij vendimi, gjatë gjithë vitit 2022, do të ketë një pagesë kalimtare e barabartë me pagën minimale, përfshirë dhe kontributet e sigurimeve shoqërore dhe shëndetësore, e cila do t’i jepet listës së ish-punonjësve të rafinerisë së naftës në Ballsh, të miratuar që në vitin 2020 në vendimin e nëntorit të vitit 2020.

Kjo listë, sigurisht që do të rishikohet me ata persona që janë të punësuar apo të vetëpunësuar, apo ata të cilët kanë dalë në pension pleqërie. Ndërkohë, ftoj të gjithë punonjësit dhe ish-punonjësit të rafinerisë në Ballsh, t’u drejtohen zyrave të punës pranë vendbanimeve të tyre me qëllim dokumentacionet për të përfituar nga kjo ndihmë, e cila do të jepet në bazë mujore përgjatë gjithë vitit 2022”, deklaroi ministrja.

Rritja e çmimit të naftës, Ibrahimaj: Priten të reduktohen pas 6 muajve

Ministrja u ndal edhe te rritja e çmimit të karburanteve. Ajo tha se pritet që çmimet të reduktohen pas 6 muajve të parë të këtij viti, ndërsa përcaktimi i çmimit të naftës bazohet tek bursa, ndaj vijojnë monitorimin e vazhdueshëm të luhatjes së çmimeve.

“Rritjet e çmimit të naftës dhe të gjithë nënprodukteve të energjisë kanë qënë subjekt i rritjeve prej muajsh tashmë, jo vetëm në Shqipëri por në të gjithë vendet e rajonit dhe Europës. Janë në të ndikuara sigurisht nga rritja e çmimeve në bursat ndërkombëtare dhe ne jemi në monitorim të këtyre çmimeve me qëllim që të bëjmë të gjithë analizat e mundshme dhe të parashikojmë të gjithë ndërhyrjet që mund të bëhem.

Megjithatë, unë dua të them që ne operojmë në një ekonomi tregu të lirë dhe nuk mund të ndërhymë në çmime. Mund të ndërmarrim politika të tjera mbrojtëse. Sipas gjithë parashikimeve të ekspertëve ndërkombëtarë, por edhe të institucioneve që merren me parashikime të çmimeve të energjisë, pritet që këto çmime të reduktohen pas 6-mujorit të parë të këtij viti. Rritja e çmimeve do të jetë kalimtare dhe jo e qëndrueshme. Me të gjitha gjasat, nuk do të ketë nevojë për ndërhyrje në politika megjithatë ne jemi të kujdesshëm dhe në monitorim të vazhdueshëm të këtyre çmimeve”./Monitor/