Vendimet/ Familjeve me viktima, nga strehimi te pensioni i posaçëm dhe bursat për fëmijët

Emëroi Bled Çuçin si i plotëfuqishëm  për emergjencat por në mbledhjen e sotme të qeverisë Çuçi nuk ishte as i plotfuqishëm as nuk iu dha fjala edhe pse është dhëndër kryesor i shtëpisë së kryeministrit. Fjalën nuk e dha as nuk e mori Kryeministri Edi Rama por filloi me një bilanc paraprak të dëmeve nga tërmeti tragjik, tregoi se sa janë strehuar, prioritetet, tha se nuk do tulla po lekë ndërsa premtoi se do të strehoj menjëherë me banesa të gjitha familjet që patën viktima nga tërmeti tragjik. Edi Rama bëri të ditur edhe akte të tjera që do të vendosë qeveria në ndihmë të këtyre familjeve ndërsa trajtim të posaçëm financiar do të gëzojnë familjet e viktimave.

Strehimi 

“Të gjitha familjet e viktimave në Durrës, familja Broshka 4 anëtarë 1 viktimë, familja Gjana 8 anëtarë 1 viktimë, familja Lala 8 anëtarë, 7 viktima. Familja Meçja 5 anëtarë, 1 viktimë. Të gjitha këto familje duhet të hyjnë në shtëpitë reja urgjent. I kemi gati mundësitë për ta. Duhet caktuar një person specifik në Durrës dhe një në Tiranë që do të bëjë kontaktin me ta për t’iu thënë se ku duan të rrinë. Viktimave të thumanës, familjeve të Thumanës kemi gati t’u ofrojmë menjëherë apartamentin në Tiranë. Kemi gati 6 apartamente në Tiranë por ju lutem në një komunikim me ta për të parë se kush është dëshira e tyre. Ky akt i parë është akti i dorëzimit apartamenteve gjithë këtyre familjeve, duhet bërë në një kohë rekord. Jemi gati tani, komunikimi do të sjellë mbrapsht gatishmërinë e tyre për të shkaur në Tiranë, ata të Thumanës, ata të Durrësit,” tha Edi Rama ndërsa lidhur me trajtimin financiar saktësoi:

“Trajtim të posaçëm financiar për familjet ku tërmeti ka marrë jetë. Trajtimi financiar do jetë për gjithë jetën. Dje kam shoqëruar Albert Carën i cili ende nuk di se i ka humbur të gjithë. Urojmë ta kapërcejë situatën e rëndë sepse është dëmtuar në shtyllën kurrizore dhe për këtë e kemi çuar për mjekim në një nga klinikat më të specializuara. Por të gjithë jemi të vetëdijshëm se si do jetë. Ashtu dhe për Lindita Carën që i ka humbur të gjithë.”

Pensionistët

Një tjetër vendim i qeverisë ka të bëjë me për familjet e viktimave të cilave do tu jepet pensioni i veçantë i Republikës së Shqipërisë, pensioniqë iu jepet njerëzve me kontribute të veçanta.

“Është një numër i kufizuar që varion në 12-15, kështu që këta njerëz do përfshihen në këtë kategori.”

Bursat

Po kështu do të akordohen 1 milion lekë të reja për çdo familje që ka viktima dhe bursa për nxënësit e studentët.

“Po ashtu nxënësit që janë në familjet e viktimave për t’iu ardhur në ndihmë, do të marrin një bursë mujore prej 15 mijë lekësh të reja në muaj. Është 3-fishi i bursës së ekselentëve. Dhe këtë bursë do ta përfitojnë edhe studentët,” përfundoi Edi Rama.

Dhe jo vetëm kaq! Kryeministri Edi Rama tha sot në mbledhjen e jashtëzakonshme të qeverisë se nuk do të lihet asnjë person i traumatziuar pa marrë ndihmë.

 “Tërësia e personave të akomoduara në strukturat hoteliere është 2472. Harku i kësaj mikpritje shtrihet nga Durrësi deri në Gjirokastër. Një nr i këtyre personave nuk janë persona që kanë humbur tërësisht shtëpinë por janë persona në një situatë traumatike dhe me shtëpinë në kushte frike që jo domosdoshmërisht janë kushte objektive që lidhen me qëndrueshmërinë e godinës. Ne nuk do të lëmë njerëz të traumatizuar pa u shërbyer në këtë fazë të parë. Ministri i Turizmit në bashkëpunim me të gjitha strukturat që janë ofruar për të bërë këtë shërbim po punon ngushtë edhe me shtabet e emergjencave për të vlerësuar çdo familje si familje që do të trajtohet në një afat të gjatë,” tha Edi Rama duke shtuar se shpejti do të ketë dhe raportin e qëndrueshmërisë së banesave.

“Falë angazhimit të grupeve që kanë filluar të vijnë, grup grek, francez, italian janë në terren, grupe të tjera vijnë sot e nesër inspektimi i godinave do të bëhet shumë shpejt dhe rezultati i qëndrueshmërisë do të merret shumë shpejt”.