Vendimi, Enti Rregullator i Energjisë: Në muajin nëntor, çmimi 44 lekë/kW mbi fashën 800 kW

Në muajin nëntor dhe dhjetor, do të aplikohet çmimi i energjisë elektrike 44 lekë për kilovatë mbi fashën 800 kW, ka bërë të ditur sot Enti Rregullator i Energjisë, ERE.

“Për të gjithë konsumatorët familjarë që furnizohen nga Shërbimi Universal (FSHU sh.a.). ERE ka detyrimin të reflektojë çmimet e energjisë së konsumatorëve fundorë të shërbimit universal, kostot e furnizimit sipas kostove të burimit të sigurimit të energjisë.

Vendimi i Brodit të ERE-s nr. 242 datë 23.09.2022, i ndryshuar me vendimin e Bordit nr.254 datë 07.10.2022, qëndron në fuqi për muajt nëntor – dhjetor 2022, dhe këto çmime mbeten të aplikueshme, ashtu si përcaktuar në vendim, për periudhën 1 nëntor 2022 – 31 dhjetor 2022,” shprehet Enti Rregullator i Energjisë duke sqaruar se vendimmarrja e ERE-s, çmimi i furnizimit me energji elektrike për konsumatorët që konsumojnë mbi fashën e konsumit 800 kW, do të mbetet objekt rishikimi periodik ndërsa përfundon:

“Bazuar në kërkesën FSHU sh.a., vendimet e Asamblesë së KESH sha, si dhe vlerësimet e ERE-s, nëpërmjet të cilave do të vlerësohen ndryshimet në çmimin e shitjes se energjisë elektrike për konsumatorët fundorë të shërbimit universal.”

Ndërkohë, Kryeministri Edi Rama i cili po fliste në një takim me banorët e Bulqizës në momentin kur u publikua njoftimi bëri sikur i erdhi e papritur meqë është folur për 42 lekë për KW dhe ERE ka vendosur për 44 lekë për KW, por gjithsesi rritja e çmimit ishte paralajmëruar edhe nga Rama.