Vendimi i BQK “për dinarin serb”, BE kërkon shpjegime nga Kosova

Pas vendimit të Bankës Qendrore të Kosovës për kryerjen e pagesave me para të gatshme vetëm në valutën euro, që nga Beogradi zyrtar u cilësua “ndalesë e përdorimit të valutës serbe, dinarit”, ka reaguar Bashkimi Evropian duke kërkuar shpjegime nga autoritete kosovare.

Duke e konfirmuar këtë reagim, zëdhënësi i BE-së, Peter Stano, kërkoi sërish nga Kosova e Serbia që të gjitha çështjet e hapura t’i zgjidhin në kuadër të procesit të dialogut.

“Jemi ende duke analizuar dhe kërkuar sqarime për vendimin, arsyet, motivet si dhe implikimet e mundshme. Por në përgjithësi Kosova dhe Serbia pritet të shmangin veprimet e pakoordinuara të cilat nuk janë të favorshme për normalizimin e marrëdhënieve dhe që mund të kenë ndikim mjaft negativ në stabilitetin në terren.

Dhe, Ne nxisim dhe thërrasim të dyja palët që ta trajtojnë këtë temë në kuadër të dialogut të lehtësuar nga BE,” tha sot në Bruksel, zëdhënësi i BE, Peter Stano.

Ndryshe, Banka Qendrore e Kosovës ka miratuar një rregullore, sipas së cilës, duke filluar nga 1 Shkurti 2024, “valuta e vetme e lejuar të përdoret për kryerjen e transaksioneve të pagesave me para të gatshme dhe në sistemin e pagesave në Republikën e Kosovës është euro, si valutë e vetme edhe në kuptim të nenit 11 të Kushtetutës së Republikës së Kosovës dhe neneve 16, 17 dhe 18 të Ligjit Nr. 03/L-209 për Bankën Qendrore të Republikës së Kosovës”.