Vendimi i Komisionit të Rindërtimit: Në Durrës do shpërndahen 137 mln lekë për rikonstruksionin e 464 pallateve e shtëpive të dëmtuara nga tërmeti

Rreth 464 familje të qytetit të Durrësit të dëmtuara nga tërmeti i 26 nëntorit do të përfitojnë kompensimin nga program i granteve për rikonstruksion.

Në total fondi i kompensimit për këto familje është rreth 137 milionë lekë. Kompensimi do të përfitohet për shtëpitë individuale të dëmtuara apo pallatet të cilat janë klasifikuar me shkallë dëmtueshmërie DS1, DS2 dhe DS3.

Në mbledhjen e fundit të Komisionit Shtetëror të Rindërtimit, drejtuar nga ministri Arben Ahmetaj dhe me përfaqësues të kabinetit qeveritar është miratuar vendimi i këshillit Bashkiak të Durrësit për kompensimin e këtyre familjeve, banesat e të cilave nuk duhen rindërtuar nga e para, por kanë nevojë për rikonstruksion.

Sipas akt konstatimeve të miratuara në vendimin e Këshillit Bashkiak të qytetit të Durrësit do të përfitojnë fondin me vlerë 12,2 milionë lekë 122 familje shtëpitë e cilave janë klasifikuar DS1. Për apartamentet e dëmtuara apo edhe shtëpitë individuale të klasifikuara si DS2 janë 185 familje dhe fondi që do të lëvrohet është rreth 46 milionë lekë. Për shtëpitë me shkallë dëmtueshmërie DS3, numri i përfituesve është 157 familje dhe vlera e fondit do të jetë 78,5 milionë lekë.

Bazuar akt-ekspertizave te thelluara të Institutit të Ndërtimit, Komisioni Shtetëror i Rindërtimit miratoi në vendim edhe rindërtimin në të njëjtin truall, të 17 shtëpive individuale të vlerësuara “për shembje” në njësinë Administrative Nr.2, 274 shtëpive individuale në njësinë Administrative Ishëm, 27 shtëpive individuale në njësinë Administrative Rrashbull të Durrësit.

Vendimi i Komisionit Shtetëror të Rindërtimit

1.Të miratojë kërkesën për financim të Bashkisë Durrës, për Programin e Granteve të Rindërtimin “Grante Rikonstruksioni”, për listën e objekteve, banesave individuale dhe njësi banimi në ndërtesa (pallat), të cilat janë klasifikuar si objekte të dëmtuara rëndë apo të dëmtuara lehtë që rezultojnë me shkallë dëmtueshmërie DS1-DS3 dhe që nuk duhen rindërtuar nga e para por kanë nevojë për punime rikonstruksioni ose riparime, sipas Akt Konstatimeve, miratuar përkatësisht me Vendimin e Këshillit të Bashkisë Durrës nr. 70 datë 20.07.2020 përcjellë pranë Komisionit Shtetëror për Rindërtim, me shkresën nr. 9397 prot., datë 21.07.2020, në masën prej 136,950,000 lekë.

2.T’i propozojë Këshillit të Ministrave përdorimin e Fondit të Rindërtimit nga Njësia e Vetëqeverisjes Vendore, Bashkia Durrës, në masën prej 136,950,000 sipas pikës 1 të këtij vendimi.

3.Të miratojë rindërtimin në të njëjtin truall, të njësive individuale të banimit, të vlerësuara “për shembje”, sipas kërkesës të Bashkisë Durrës, me nr. prot 9395, datë 21.07.2020, për rindërtimin e 17 shtëpive individuale në njësinë Administrative Nr.2, 274 shtëpive individuale në njësinë Administrative Ishëm, 27 shtëpive individuale në njësinë Administrative Rrashbull, Bashkia Durrës, në zbatim të Vendimeve të Këshillit Bashkiak Nr 71, datë 20.07.2020, Nr 72, datë 20.07.2020, Nr 73, datë 20.07.2020, sipas listës bashkëlidhur këtyre VKB-ve, bazuar në Akt-Ekspertiza te thelluara të Institutit të Ndërtimit. Rindërtimi në të njëjtin truall, të njësive individuale të banimit, do të bëhet sipas projekteve model të hartuara nga Enti Kombëtar i Banesave.

4.Të miratojë rindërtimin në të njëjtin truall, të njësive individuale të banimit, të vlerësuara “për shembje”, sipas kërkesës të Bashkisë Kurbin, me nr. prot 3016, datë 21.07.2020, për rindërtimin e 205 shtëpive individuale, në zbatim të Vendimit të Këshillit Bashkiak Nr .91, datë 20.07.2020, sipas listës bashkëlidhur këtij VKB-je, bazuar në Akt-Ekspertizat e thelluara të Institutit të Ndërtimit. Rindërtimi në të njëjtin truall, të njësive individuale të banimit, do të bëhet sipas projekteve model të hartuara nga Enti Kombëtar i Banesave.

5.Agjencia Kombëtare e Planifikimit të Territorit, së bashku me Bashkinë Durrës dhe Kurbin pas miratimit të këtij vendimi, të fillojnë nga puna për hartimin e PDyV-ve për zonat e dëmtuara pikësore, ku njësitë individuale të banimit, janë vlerësuar për “shembje” nga Instituti i Ndërtimit dhe janë miratuar nga Këshilli Bashkiak, sipas pikës 3 dhe 4 të këtij Vendimi.

6.Ngarkohen Ministri i Shtetit për Rindërtim, Ministria e Mbrojtjes, Ministria e Brendshme, Ministria e Financave dhe Ekonomisë, Ministria e Infrastrukturës dhe Energjisë, Ministria e Arsimit, Sportit dhe Rinisë, Ministria e Kulturës, Ministria e Bujqësisë dhe Zhvillimit Rural, Ministria e Shëndetësisë dhe Mbrojtjes Sociale, Ministria e Turizmit dhe Mjedisit, Agjencia Kombëtare e Planifikimit te Territorit, Fondi Shqiptar i Zhvillimit, bashkitë Durrës, Kurbin për zbatimin e këtij vendimi./Monitor/