Vendimi i LDK/ Të hënën, kandidati për Kryeministër dhe koalicioni me Vetëvendosje

Lidhja Demokratike e Kosovës, LDK, as sot nuk ka marrë sot vendim për kandidatin e saj për kryeministër në zgjedhjet e parakohshme që pritet të mbahen në fund të shtatorit ose fillim të tetorit.

Një gjë e tillë është shtyrë për t’u bërë në mbledhjen e ardhshme të Kryesisë së re të kësaj partie, e cila pritet të mbahet të hënën në mëngjes.

Në rast se nuk do të ketë konsensus në kryesi të partisë të hënën për emrin e mandatarit, atëherë votimi do të kalojë në Këshillin e Përgjithshëm të partisë.

Në mbledhjen e sotme të Kryesisë së partisë nuk kanë marrë fare pjesë Lufti Haziri e Agim Veliu, pasi ata janë të pakënaqur me faktin që Vjosa Osmani pritet të nominohet për kandidate për kryeministre.

Zëdhënësi i LDK-së pas mbledhjes theksoi se të hënën do të diskutohet edhe rreth koalicionit me Vetëvendosjen, derisa tha se në mbledhjen e sotme u konfirmua edhe një herë qëndrimi i LDK-së se në asnjë rrethanë nuk do të hyjnë në koalicion me PDK-në.