Vendimi i parë si Kryeministër, Basha në Kosovë: Heqja e traut dhe taksës në Rrugën e Kombit!

Duke filluar vizitën e tij dyditore në Kosovë me takimin me Kryeministrin Avdullah Hoti, Kryetari i Partisë Demokratike, Lulzim Basha, u zotua pas takimit se si vendimi i tij i parë si Kryeministër i ardhshëm i Shqipërisë do të jetë heqja e traut dhe taksës në Rrugën e Kombit:

“Unë ndodhem gjithmonë me kënaqësi shumë të madhe në Prishtinë që është edhe qyteti im i dytë pas Tiranës jo vetëm sepse gjatë viteve 2000-2004 kam jetuar këtu por edhe sepse më shpallët qytetar nderi të Prishtinës para disa vitesh.

Po ndjekim me shqetësim pandeminë COVID, jam i inkurajuar nga paketa e masave që ju keni njoftuar qoftë ne aspektin shëndetësor qoftë në aspektin socio-ekonomik. Me paketën që keni njoftuar në raport me PBB, ju vendos në krye të vendeve të rajonit dhe ju bën një shembull edhe për Shqipërinë.

Për bisedimet me Serbinë, ju shpreh mbështetjen e plotë timen, PD-së dhe opozitës së bashkuar në këtë përqasje parimore që ka dhe mund të ketë vetëm një përfundim njohjen reciproke mes Kosovës e Serbisë. Tek PD do keni një partner të devotshëm që ato punë që kemi nisur si Rruga e Kombit dhe liberalizimi ekonomik të vazhdojnë dhe më tej,” tha Lulzim Basha duke u zotuar publikisht edhe në Prishtinë pas takimit me Kryeministrin e Kosovës, Avdullah Hoti, për heqjen e taksës në Rrugën e Kombit:

“Një nga vendimet e para të mia, do të jetë heqja e taksës dhe traut në Rrugën e Kombit, një vendim i padrejtë. Po kështu një thellim të bashkëpunimit në të gjitha fushat e tjera. Dua të çmoj lart qëndrimet tuaja dhe fokusin tuaj në bashkëpunimin ekonomik ku do të keni mbështetjen time dhe të PD-së.”

Pas takimit me Kryeministrin e Kosovës, Avdullah Hoti, Kryetari i Partisë Demokratike, Lulzim Basha, vazhdoi axhendën e vizitës së tij dy ditore, në Presidencë në takim me Presidentin e Kosovës, Hashim Thaçi.