Vendimi/ Incidenti në sfidën Shqipëri-Poloni, FIFA dënon kombëtaren kuqezi

Ndonëse sulmuesi polak Karol Swiderski i cili shënoi golin e fitores në stadiumin “Air Albania” kërkoi falje se kishte provokuar tifozët kuqezi të cilët shkaktuan dhe incidentin pas sjelljes së tij, Komiteti Disiplinor i FIFA-s ka marrë vendim të gjobitë FSHF-n për incidentin në sfidën Shqipëri-Poloni me 150 mijë franga dhe me një ndeshje pa tifozë në shtëpi, ndaj Andorrës më 15 nëntor.

Ndryshe, pas incidentit në stadiumin “Ai Albania” ku për pak minuta dhe u ndërpre ndeshja Shqipëri-Poloni, dhe i cili u dënua nga të gjitha instancat dhe sportadashësit shqiptarë, sulmuesi polak Karol Swiderski, për TVP Sport polak e pranoi pas ndeshjes se ai kishte faj pse ishte shkuar të festoj golin e fitores para tifozëve kuqezi.

“Ishte një ndjenjë fantastike të shënosh një gol në një lojë të tillë në një stadium të huaj. Me siguri do ta mbaj mend. Nga ana tjetër, fakti që tifozët reaguan ashtu ishte pjesërisht faji im. Unë vrapova pa nevojë drejt tyre për të festuar, por isha nën ndikimin e emocioneve. Ndodhi.”

Njoftimi i FSHF-së

“Federata Shqiptare e Futbollit është njohur mbrëmjen e sotme me vendimin e marrë nga Komiteti Disiplinor i FIFA-s, në lidhje me incidentet e ndodhura në ndeshjen Shqipëri-Poloni, e luajtur më datë 12 tetor 2021 në Air Albania Stadium.

Vendimi i sotëm ndëshkon Federatën e Futbollit me një gjobë prej 150 mijë frangash dhe detyron që të luajë ndeshjen e fundit eliminatore për Kampionatin Botëror “Katar 2022” pa praninë e tifozëve.

FSHF shpreh keqardhjen për këtë vendim të marrë dhe do të ndërmarë të gjithë masat e nevojshme që situata të tilla, të shkaktuara nga disa individë, mos të ndodhin më në të ardhmen dhe të mos dëmtojnë Kombëtaren tonë në paraqitjen e tyre ndërkombëtare.

Federata do të vlerësojë mundësitë për ankimimin e vendimit brenda afateve të parashikuara.”