Vendimi, KAS: Të hapen kutitë në 24 Qendrat e Votimit të Qarku Berat
Komisioni i Ankimimeve dhe Sanksioneve, KAS, mori vendim që pranoi kërkesën e LSI-së që të hapen kutitë në 24 Qendrat e Votimit të Qarkut Berat. Ndërkohë, KAS, rrëzoi kërkesën e Partisë Demokratike për marrjen e informacionit shtesë nga institucionet shëndetësore dhe organet ligjzbatues, si SPAK dhe Prokuroria, për të vërtetuar shkeljet zgjedhore, që pretendon PD.
“Ankimet 34 e 35 të subjekteve zgjedhore LSI dhe PD, lidhur me kundërshtimin dhe shpalljen e pavlefshëm të zgjedhjeve në qarkun Berat. Në vlerësim të provave e fakteve të paraqitura nga palët, KAS vendosi:
Marrjen kryesisht në cilësinë e provës të dokumentacionit dhe materialit zgjedhor që ndodhet në kutitë e materialeve të votimit për 24 Qendrat e Votimit të ZAZ qarku Berat,” tha kryesuesi i seancës, Elvis Çefa duke saktësuar:
“Ngarkohet administrata e KQZ-së për të marrë të gjitha masat për transportin dhe hapjen e kutive të sipërpërmendura për administrim e provave të sipërcituara. KAS me shumicë votash vendosi mospranimin e kërkesës së PD-AN për marrjen e provave dhe informacioneve shtesë të cituara në kërkesën ankimore. Me kërkesë timen dhe Ledio Brahos, dy anëtarëve të KAS, vendosëm të administrojmë si provë të dhënat e kryqëzuara së pajisjes së identifikimit të zgjedhësve të zonës zgjedhore qarkut Berat për të bërë të mundur evidentimin e votimeve të dyfishta ose familjare sipas pretendimit të bërë nga PD-AN.”
Mbledhja e Komisionit të Ankimimeve dhe Sanksioneve ku do të hapen kutitë e votimit pritet të zhvillohet të hënën, 17 Maj në orën 10:00.
Ndryshe, ky Vendim erdhi pasi Komisioni i Ankimimeve dhe Sanksioneve shqyrtoi kërkesat ankimore nr. 34 me objekt “Ndryshimin e vendimit të Komisionerit Shtetëror të Zgjedhjeve me nr. 339, datë 04.05.2021 “Për miratimin e Tabelës Përmbledhëse për rezultatin e votimit në zonën zgjedhore, qarku Berat për subjektet zgjedhore dhe kandidatët për deputetë në zgjedhjet për Kuvendin e Shqipërisë, të datës 25 prill 2021”, me ankues Partia Lëvizja Socialiste për Integrim, nr. 35 me objekt “Shpalljen e pavlefshme të procesit të votimit në qendrat e votimit të qarkut Berat, vijuese si me poshtë: QV 3446, QV 3431, QV 3445, QV 3318, QV 3275, QV 3270, QV 3287, QV 3307, QV 3472, QV 3473, QV 3482, QV 3325, QV 3456, QV 3440, QV 3330, QV 3220, QV 3433, QV 3328, QV 3429/1, QV 3518, QV 351, QV 3501, QV 3416 dhe përsëritjen e Zgjedhjeve në qarkun Berat”, me ankues Partia Lëvizja Socialiste për Integrim dhe nr. 42 me objekt “Kundërshtimin e vendimit të Komisionerit Shtetëror të Zgjedhjeve me nr. 339, datë 04.05.2021 “Për miratimin e Tabelës Përmbledhëse për rezultatin e votimit në zonën zgjedhore, qarku Berat, për subjektet zgjedhore dhe kandidatët për deputetë në zgjedhjet për Kuvendin e Shqipërisë, të datës 25 prill 2021”, “Pavlefshmëria e zgjedhjeve të zhvilluara në datën 25.04.2021 në zonën zgjedhore, qarku Berat” dhe “Urdhërimin e përsëritjes së zgjedhjeve për Kuvendin e Shqipërisë në të gjithë zonën zgjedhore, qarku Berat në periudhën më të afërt zgjedhore”, me ankues Partia Demokratike e Shqipërisë.
Ndërkohë, KAS ka verifikuar elementët e formës dhe të përmbajtjes së kërkesës ankimore nr. 54 me objekt “Pajisjen me rregjistrimin e kamerave të KZAZ-së nr. 02, nr. 03, nr. 04, nr. 05, nr. 06, nr. 07 dhe nr. 08”, me ankues kandidatin e pavarur, z. Pal Shkambi. Në përfundim të verifikimit, KAS vendosi moskalimin për shqyrtim të kërkesës ankimore.
