Vendimi, KAS: Të rinumërohen 114 kutitë e Beratit!

Komisioni i Ankimimeve dhe Sanksioneve, KAS, ka pranuar sot ankimimin e LSI duke vendosur të rinumërohen 114 kutitë e Beratit për të cilat ka pretendime se ka pasur shkelje. Ndërsa ka refuzuar kërkesën për përsëritjen e zgjedhjeve në Qarkun Vlorë e cila ishte bërë nga PD e LSI.

Gjatë shqyrtimit në KAS, LSI kërkoi rinumërimin në të gjithë Qarkun Berat, kërkesë e mbështetur dhe nga PD, por PS ndonëse ra dakord për rinumërimin, por vetëm të kutive të ankimuara.

Kështu KAS vendosi të rinumërohen vetëm votat për subjektet zgjedhore.

Por kjo nuk ndodhi edhe me Qarkun Vlorë ku Komisioni i Ankesave dhe Sanksioneve refuzon kërkesën e PD dhe LSI.

“KAS me shumicë votash vendosi: rrëzimin e kërkesës ankimore 36 të paraqitur nga PD-AN. Rrëzimin e kërkesës ankimore 49 të paraqitur nga LSI. Lënien në fuqi të vendimit të Komisionarit për rezultatin e votimit për qarkun e Vlorës,” sqaroi relatori.

Ndryshe, dje KAS rrëzoi kërkesat e PD dhe LSI për rivotim dhe rinumërim në Qarkun e Gjirokastrës dhe për përsëritjen e zgjedhjeve në Berat pas pretendimve se disa votues kishin vendosur shenjat e gishtave për më shumë se 1 herë. KAS i quajti si të pamjaftueshme denoncimet e partive opozitare për shkelje në procesin e votimit dhe në pajisjen e PEI.

Betejën ligjore si PD ashtu dhe LSI e paralajmëruan se do ta vazhdojnë në Kolegjin Zgjedhor!