Vendimi/ Këshilli i Ministrave shkarkon Kryetarin e Bashkisë Tiranë, Erion Veliaj
Pas propozimit të Këshillit Bashkiak, sot Këshilli i Ministrave ka vendosur të shkarkoj Erion Veliajn nga posti i Kryetarit të Bashkisë Tiranë.
Kryeministri Edi Rama pasi u shpreh qartë dje në takim me deputetët e PS të Qarkut Tiranë, se pas 7 muajsh pa një kryetar bashkie të dënuar nga drejtësia në lidhje me detyrën, u detyrua të marrë hapin e detyrueshëm për fatin e kryeqytetit të Shqipërisë, sot firmosi shkarkimin.
“Pas 7 muajsh pa një kryetar bashkie të votuar në krye të detyrës dhe po ashtu pa një kryetar bashkie të dënuar nga drejtësia në lidhje me detyrën, u detyruam të marrim një hap të debatueshëm, por të detyrueshëm për fatin e kryeqytetit të Shqipërisë.”
Kandidate e PS për kreun e Bashkisë Tiranë në zgjedhjet e parakohshme është, Ogerta Manastirliu, ndërsa fushata do të drejtohet nga Belinda Balluku.
Kështu, njeriu që shiste fiq dhe iu prezantua për herë të parë publikut shqiptar në vitin 2004 me drejtimin e shpikjes së Edi Ramës, Lëvizja Mjaft, që organizoi protesta kundër qeverisë socialistë të drejtuar nga Fatos Nano derisa Rama u zgjodh kryetar i PS, për t’u futur në politikë me partinë G99 në zgjedhjet parlamentare në vitin 2009, sot u fik!
U fik, në mënyrën më të turpshme të mundshme, arrestuar me pranga në zyren e tij si Kryetar i Bashkisë Tiranë i zgjedhur për herë të tretë, dhe i shkarkuar po nga Këshilli i tij Bashkiak më 23 shtator!
Ndryshe, Erion Veliaj është arrestuar me 10 shkurt të këtij viti ku SPAK ka ngritur ndaj tij akuzat e korrupsionit, pastrimit të parave dhe fshehjes së pasurisë.
Më 10 shtator të këtij viti, SPAK dërgoi në gjyq Erion Veliajn, bashkëshorten e tij Ajola Xoxa, ish-deputeten e PS, Klotilda Bushka, biznesmenët Gentian Sula, Elman Abule, Fatmir Bektashi, Shkëlqim Fusha, Meriman Palushi dhe Sokol Kryeziu, dhe 9 persona të tjerë. Ndaj Veliajt janë ngritur 13 akuza, përfshi ato për korrupsion, pastrim parash dhe deri te mbajtja e sendeve të paligjshme në qeli gjatë paraburgimit.
