Vendimi/ Këshilli Kombëtar i PD: Zgjedhjet për Kryetarin, më 13 qershor
Partia Demokratike zgjedh Kryetarin më 13 Qershor. Me asnjë votë kundër, sot 238 anëtarë të Këshillit Kombëtar të PD miratuan propozimin e Kryesisë së për datën e zgjedhjeve si dhe përbërjen e Komisionit zgjedhor.
Deri më tani kandidatë të shpallur për Kryetar janë Lulzim Basha dhe Fatbardh Kadilli, ndëra kandidaturat tjera sipas këtij vendimi mund të shpallen deri më 22 maj.
Më pas nis fushata brenda Partisë Demokratike nga 24 maji deri më 11 qershor kurse më 13 qershor demokratët votojnë sipas parimit një anëtar- një votë për Kryetarin.
Po ashtu me asnjë votë kundër është miratuar edhe Komisioni Zgjedhor për zgjedhjet e 13 Qershorit me kryetar Jemin Gjatën dhe anëtarë Albana Vokshi, Belind Këlliçi, Eno Bozdo, Mimoza Hasekiu, Albert Avduli dhe Gjokë Vuksani. Ndërkohë anëtar zëvendësues do të jetë Çlirim Gjata.
Ndryshe, në mbledhjen e Kryesisë dhe Këshillit Kombëtar pati debate ku kryetari Lulzim Basha u përball për herë të parë me kritikët e tij pas zgjedhjeve të 25 prillit, ku Bujar Nishani, Fatbardh Kadilli dhe Arben Ristani i kërkuan dorëheqjen e parevokueshme.
Sot, Lulzim Basha para Këshillit Kombëtar u shpreh qartë se nëse zgjedhjet e 25 prillit pranohen si të rregullta nga demokratët, atëhere ai do jep dorëheqjen që sot, por nëse konsiderohen të vjedhura atëhere beteja duhet të vijojë.
