Vendimi, KLGJ: Pezullohet nga detyra gjyqtarja Enkeleda Kapedani

Pas publikimit të videove në rrjetin social “Tik-Tok”, sot Këshilli i Lartë Gjyqësor, KLGJ, ka vendosur të pezullojë nga detyra kryegjyqtaren në detyrë të Gjykatës së Elbasanit, Enkeleda Kapedani, deri në përfundim të procesit gjyqësor i cili ka nisur kundër saj.

Ky vendim i KLGJ erdhi pas kërkesës së ILD për pezullimin dhe shkarkimin e gjyqtares Kapedani, pas videove që gjyqtarja publikonte në Tik-Tok, ku shfaqej duke bërë sfilatë në zyrën e saj në gjykatë. Kreu i ILD-së, Artur Metani, tha gjatë seancës së sotme gjyqësore se ekzistojnë kushtet që gjyqtarja të pezullohet.

“Në rastin konkret ekzistojnë kushtet ligjore për caktimin ndaj magjistrates Enkeleda Kapedani të masës provizore të pezullimit nga ushtrim i detyrës deri në përfundimin e procedimit disiplinor, për shkak se vazhdimi i magjistratit në detyrë diskrediton rëndë figurën dhe pozitën e magjistratit,” tha Artur Metani.

Ndryshe, gjatë raportimit në ILD, vetë gjyqtarja Enkeleda Kapedani ka kërkuar ndjesë publike, por tha se publikimi i videove është bërë me qëllim për ta dëmtuar atë. Ajo e konsideron veten “kokë turku” ndërsa është përlotur para KLGJ-së duke thënë se disa persona donin të arrinin qëllimet e tyre përmes saj. Se cilët janë këta persona, që duan ta dëmtojnë, gjyqtarja Kapedani nuk ka përmendur emra