Vendimi, KLP: Klodian Braho, kreu i ri i SPAK

Këshilli i Lartë i Prokurorisë, KLP, zgjodhi Klodian Braho kryetar të ri të  Prokurorisë së Posaçme kundër Korrupsionit dhe Krimit të Organizuar, SPAK .

Ishin 7 anëtarë të Këshilli të Lartë të Prokurorisë që votuan për prokurorin Klodian Brahon, prokurori Adnan Xholi mori 3 vota, 1 votë shkoi për prokurorin Elvin Gokajn ndërsa për prokuroren Doloreza Musabelliu asnjë votë.

Klodian Braho do të ketë një mandat 3-vjeçar si drejtues i SPAK, duke pasuar në këtë detyrë Altin Dumanin duke filluar nga data 19 dhjetor.

Aktualisht, Koldian Braho mban detyrën e shefit të seksionit kundër korrupsionit në Prokurorisë së Posaçme. 

Për të gjithë ata që pyesin pse sot u zgjodh Klodian Braho në krye të SPAK-ut, mjafotn fakti që ka hetuar dosjet edhe sot shumë të përfolura të ish-kryeprokurorit Adriatik Llalla, dosjen Toyota Yaris, 5 D si dhe kryesuar hetimet për ish-zv/kryeministrin Arben Ahmetaj, të cilin e ndau nga Mirel Mërtiri, Stela Gugallja, Klodian Zoto tek inceneratori i Elbasanit.

Ndryshe, sot, kur Klodian Braho u pyet si kandidat për kreun e SPAK nga anëtarët e KLP-së nëse do të zgjidhte stabilitetin e vendit apo vënien në vend të drejtësisë teksa hetonte një çështje, ai ishte i prerë:

“Kam pasur çështje që kanë shkaktuar efekte, por nuk kam menduar ndonjëherë se hetimi i një çështje sjell probleme në stabilitetin e vendit. Mendoj se hetimi i çështjes sjell të mira për vendin dhe nuk e destabilizon atë. Stabiliteti nuk komentohet me këshilla apo vendime, por mblidhet Këshilli i Sigurisë.

Një çështje penale nuk e sjell një problematikë për stabilitetin e vendit. Nuk mund të mbulohet një vepër penale me asnjë arsyetim tjetër.”

Premtim apo parim në profesionalizëm, kjo mbetet për tu parë nga Klodian Braho, i cili përpara ka çështje shumë të rëndësishme që do të konfirmojnë nëse drejtësia do të vihet në vend!