Vendimi, Komiteti Teknik: Arsimi parauniversitar, mësim në klasa

 Duke konstatuar se vaksinimi po ecën me ritme të larta, Komiteti Teknik i Ekspertëve bëri të ditur se cilat janë 3 qarqet më problematike ku nuk ka ndryshime të ndjeshme ndërsa u publikua dhe vendimi që shkollat e mesme të kthehen në klasa dhe të mos e zhvillojnë mësim të alternuar.

“Komiteti Teknik ka arritur në konkluzionin që situata është e qëndrueshme, por ka një rritje të lehtë të shtrimeve në spitale dhe thirrjeve të 127. Shpresoj që kjo situatë të mos rëndohet. Janë vaksinuar me dy doza, personeli mjekësor, një pjesë e mirë e arsimtarëve kanë përfunduar dozën e parë, po vijon dhe vaksinimi për kategoritë e tjera. Jemi nga vendet e para për ritmin.

Duke peshuar masat që kemi marrë, Komiteti Teknik mendon që të propozojë ministrisë të arsimit, që të kalojë atë parauniversitar në kombinuar, në kthimin në klasë, duke ndjekur në mënyrë rigoroze masat. Duhet të respektojmë distancimin fizik.

Vetëm me këto masa, me këtë ritëm, edhe me shtimin e vaksinimit, do të mundim të kemi një kontroll të mirë mbi pandeminë. Një rritje të ekonomikë dhe realizim të mirë të aktiviteteve të turizmit,” tha kreu i Komitetit dhe Zv/ministrja e Shëndetësisë, Mira Rakacolli.

 Duke raportuar mbi situatën epidemiologjike, Drejtorja e ISHP, Albana Fico, tha se ka pasur rënie të numrit të pacientëve në intubim dhe shtrimeve në spitale nga Covid-19, por sipas saj, beteja me virusin nuk është fituar akoma, ndaj dhe qytetarët duhet të zbatojnë masat.

“Situata me koronavirusin është e qëndrueshme. Ka pësuar një ulje numri i të shtruarve në spitale dhe numri i atyre në intubim. Gjatë gjithë kësaj periudhe është vijuar me vaksinimin, ku deri më dje është me një mesatare ditore te 16 mijë. Gjirokastra, Berati dhe Korça nuk kanë pësuar ndryshime të ndjeshme për të vlerësuar në masat e marra paraprakisht,” tha Albana Fico duke pqrfunduar:

“Gjej rastin që përmes këtij komunikimi të kujtoj qytetarët se nuk ka përfunduar beteja jonë me virusin, prandaj respektimi i rregullave, mbajtja e maskës, distancimi social, higjiena personale dhe karantinimi i rasteve të reja, duhet të vijojnë.”

Ndërkohë e pyetur nëse janë respektuar masat Anticovid në zgjedhjet e 25 prilli, kreu i Komitetit Teknik foli me gjuhën e Kryeministrit, tha shumë duke mos thënë asgjë:

“Siç jeni në dijeni, edhe nga raportimet tona para zgjedhjeve, është vendosur protokoll për covid, në të gjitha qendrat e votimit. KQZ ka pasur protokoll se si do të zbatohej protokolli. Kemi pasur grupe në teren, që kanë vijuar respektimin e masave.”