Vendimi, KPA: Shkarkohet nga detyra kreu i KLP-së, Alfred Balla, 15 vite jashtë sistemit të drejtësisë

Kolegji i Posaçëm i Apelimit, KPA, vendosi sot të shkarkoi nga detyra kreun e Këshillit të Lartë të Prokurorisë, KLP, Alfred Balla, si dhe largimin nga sistemi i drejtësisë për 15 vjet.

“Trupi gjykues e gjen të drejtë ankimin e Komisionerit publik duke konkluduar se vendimi i KPK-së është i pabazuar në fakte e ligj dhe si i tillë duhet ndryshuar. Trupi gjykues me shumicë votash vendos ndryshimin e vendimit nr 675 të KPK-së si më poshtë: Ndërprerjen e procesit të rivlerësimit për Alfred Ballën. Subjekti i vlerësimit nuk mund të emërohet gjyqtar apo prokuror i çdo niveli, anëtar i KLP-së apo KLGj-së, inspektor i lartë i drejtësisë apo prokuror i përgjithshëm për një periudhë 15 vjeçare,” u tha në vendimin e lexuar nga anëtarja e KPA, Ina Rama.

Vendimi i Kolegjit Posaçëm i Apelimit u dha nga trupa gjykuese e kryesuar nga Ina Rama, relatore Albana Shtylla, dhe anëtarë, Natasha Mulaj, Rezarta Schuetz e Sokol Çomo.

Ndryshe, në qershor të vitit 2023, KPK vendosi të pranojë kërkesën e Alfred Ballës, duke vendosur ndërprerjen e procesit të rivlerësimit të tij pa vendim përfundimtar, për shkak se u konsiderua se ai nuk ishte subjekt i ligjit.

Komisioneri Publik nuk ishte dakord me këtë vendim. Irena Nino iu drejtua Kolegjit të Posaçëm të Apelimit për ndërprerjen e procesit të rivlerësimit dhe ndalimin e tij për t’u përfshirë në organet e sistemit të drejtësisë për 15 vjet.

Sipas Komisioneres Publike, Alfred Balla e ka pasur statusin e ndihmësit ligjor në kohën e hyrjes në fuqi të ligjit të Vetingut dhe e ka humbur atë me dorëheqjen drejtuar Këshillit të Lartë Gjyqësor në vitin 2023. Për komisioneren Nino, Alfred Balla ka dhënë dorëheqjen pa u përfshirë në veting, gjë e cila e pengon të emërohet në detyra të tjera në gjyqësor.

Në seancën e zhvilluar më datë 29 prill 2024, Komisionerja Publike i qëndroi të njëjtës kërkesë.