Vendimi, KQZ: Të numërohen votat nga Greqia

Kreu i Komisionit Qendror të Zgjedhjeve, Ilirian Celibashi, ka vendosur hapjen e kutive dhe numërimin e zarfeve të votave të ardhura nga diaspora shqiptare në Greqi.

“Komisioneri Shtetëror i Zgjedhjeve vendosi vazhdimin dhe përfundimin e numërimit e vlerësimit të çdo dokumentacioni zgjedhor të mbërritura jashtë territorit të Shqipërisë në Komisionin Qendror të Zgjedhjeve, si edhe tabelimin e rezultateve përkatëse për subjektet zgjedhore, kandidatët që i janë nënshtruar votimit preferencial për çdo qark.
Ky urdhërim i Komisionerit përfshin edhe zarfet (e mbërrituara nga Greqia) të cilat nuk janë shqyrtuar dhe janë administruar sipas vendimit të KSHZ nr. 1121, datë 12.05.2025,” tha Ilirian Celibashi duke arsyetuar kërkesën e pranuar të KQZ nga PS.

Ndryshe, votat e mbërritura nga Greqia u lanë pezull pas kërkesës së bërë nga PD drejtuar KQZ, por pas këtij vendimi, PS e ankimoi në KAS, dhe ky i fundit i dha të drejtë.

Partia Demokratike ka depozituar një kallëzim penal ndaj KQZ-së, duke kërkuar sërish anulimin e vendimit për numërimin e votave të mbërritura nga diaspora shqiptare në Greqi.