Vendimi, Kryesia e PD: Hapet procesi i përzgjedhjes së kandidatëve për deputetë!
Sot Partia Demokratike fillon procesin e përzgjedhjes së kandidateve për deputetë. Mënyrën e përzgjedhjes sot e miratoi Kryesia e Partisë Demokratike ku përfundimisht rolin kryesor e ka anëtarësia, që është dhe premtimi kryesor i Kryetarit të PD, Lulzim Basha, për hapjen dhe demokratizimin e partisë si dhe fuqizimin e rolit të anëtarit në vendimmarrjet më të rëndësishme politike.
“Për herë të parë do të ngrihet një komision i vlerësimit të kandidaturave. Rregullat dhe parimet mbi të cilat do të kryhet përzgjedhja e kandidatêve ndahen në katër faza,” sqaron Partia Demokratike duke saktësuar vendimet e Kryesisë së PD:
1. Identifikimi dhe propozimi i kandidatëve nga anëtarët
Identifikimi i kandidaturave të mundshme do të bëhet në dy mënyra:
-Propozimi nga anëtarët e partisë në mbledhjet e Grupseksioneve, ku secili anëtar do të ketë të drejtën të propozojë vetëm një kandidat.
-Vetëkandidimi, ku një person shpreh interes për të qenë kandidat i mundshëm. Vetëpropozimi duhet të shoqërohet me mbështetjen e të paktën 10 anëtarëve të Partisë.
Procesi në këtë fazë ndiqet nga Degët e Partisë dhe monitorohet e drejtohet nga Grupi Qendror i Koordinimit (zyrtar të Partisë që nuk kanë konflikt interesi me zonat që do të mbulojnë).
Kjo fazë është parashikuar të filloj sot dhe të përmbyllet më 31 Korrik 2020
2. Verifikimi dhe seleksionimi i kandidatëve
Seleksionimi i kandidatëve të dalë nga faza e parë do të bëhet nga Komisioni i Vlerësimit të Kandidatëve, që do të përbëhet nga 5 anëtarë dhe 2 ndihmës. Anëtarët do të jenë ish-drejtues të lartë të partisë, personalitete të shoqërisë civile dhe medias, përfaqësues të botës akademike, etj. Komisioni bën vlerësimin e secilit kandidat, nëse përmbush kriteret e parashikuara nga udhëzimi apo jo. Në përfundim të procesit hartohen dy lista:
1.Listën e kandidatëve që do t’i nënshtrohen procesit të konsultimit me anëtarët;
2.Listën e kandidatëve që u shtyhet aprovimi.
Kjo fazë është parashikuar të filloj më 1 Gusht dhe të përmbyllet më 15 shtator
3. Konsultimi i listës se kandidatëve potencialë nga anëtarësia
Anëtarët e Partisë, sipas parimit “një anëtar, një votë”, bëjnë konfirmimin e kandidaturave të mundshme, sipas kësaj procedure: Listat e kandidatëve për konfirmim hartohen në nivel Dege, grup degësh apo Qarku, në varësi të numrit të kandidatëve apo numrit të anëtarëve në një Degë apo Qark. Në një ditë të shpallur paraprakisht për votim, cdo anëtar ka të drejtën që të shprehë kontestimin e tij (“votë kontestuese”) për një ose më shumë kandidatë nga lista. Numri i lejuar i kandidatëve që mund të kontestohen, përcaktohet në Fletën e Votimit dhe është jo më shumë se 20 % e numrit total të listës së kandidatëve, për secilën Degë apo Qark. Kandidati që ka më shumë se 20 % “votë kontestuese”, në raport me numrin e përgjithshëm të anëtarëve të Partisë në atë Degë apo Qark, hiqet nga lista e kandidatëve të konfirmuar dhe përfshihet në listën e kandidatëve që u shtyhet aprovimi.
Kjo fazë është parashikuar të filloj më 15 shtator dhe të përmbyllet më 20 shtator
4. Zyrtarizimi i listës nga Kryesia dhe miratimi nga Këshilli Kombëtar
Kandidatët e listës së Partisë përzgjidhen nga kandidaturat e konfirmuara nga anëtarësia në fazën e dytë, sipas këtij raporti: kandidaturat e konfirmuara nga anëtarësia do të përbëjnë jo më pak se 80 % të listës së kandidatëve të Partisë në zgjedhje, ndërkohë që jo më shumë se 20 % e listës së kandidatëve do të përzgjidhen nga Kryesia e PDSH-së, si prurje të reja nga bota akademike apo shoqëria civile; përfaqësues të të përndjekurve politikë apo pronarëve; përfaqësues të diasporës; përfaqësues të sipërmarrjes; personalitete politike me kontribut të gjatë në parti; etj. Gjatë kësaj faze do të mbahet në konsideratë: (1) përfaqësimi i grave të jetë jo më pak se 30 % e numrit të përgjithshëm të kandidatëve. (2) përfaqësimi i të rinjve të jetë jo më pak se 10 % e numrit të përgjithshëm të kandidatëve. (3) përfaqësimi i shtresës së të përndjekurve politikë apo pronarëve.
Realizimi i kësaj faze varet nga afatet ligjore të parashikuara në Kodin Zgjedhor.
Duke e konsideruar si një nga hapat më të rëndësishëm që ndërmerr një parti politike në Shqipëri, bazuar në praktikat më të mira demokratike, përmes të cilit fuqizohet anëtarësia, rritet roli i saj dhe garantohet një lidhje dhe llogaridhënie e fortë mes të zgjedhurve dhe anëtarit te partisë, Partia Demokratike, gjithashtu garanton:
“Ky proces garanton një proces te hapur për të gjithë ata që duan të jenë pjesë e garës, pa asnjë paragjykim dhe bazuar mbi rregulla dhe norma transparente,” thekson Partia Demokratike me rastin e fillimit të përzgjedhjes së kandidateve për deputetë duke përfunduar:
“Te vetmit qe nuk do te mund të jenë pjese e garës janë personat qe janë subjekt i ligjit te Dekriminalizimit, kane qene funksionar te larte para viteve 90 apo bashkëpunëtor te sigurimit te shtetit. Gratë, te rinjtë, te përndjekurit dhe pronaret do te kenë një përfaqësim dinjitoz ne listën e deputeteve te PD.”
