Vendimi, masat e reja kundër COVID-19

Qeveria e Kosovës ka marrë vendim për ashpërsim të masave për parandalimin e përhapjes së virusit COVID-19.

Në mbledhjen e sotme, Qeveria ka marrë vendim që prej datës 20 gusht, hyrja në klubet e natës dhe ahengjet familjare të bëhet vetëm nëse dëshmohet për certifikatën e vaksinimit të plotë, marrjen e një doze të vaksinës kundër COVID-19 ose testin negativ, jo më të vjetër se 72 orë.

Tjetra dëshmi është nëse personi e ka kaluar virusin COVID-19 në 180 ditët e fundit.

Ndërkohë, këtyre iu lejua puna deri në orën 03:00.

Ministri i Shëndetësisë, Arben Vitia tha se këto masa janë në përputhje me situatën epidiomiologjike, por duke mos cenuar as situatën ekonomike.

“Masat janë në proporcion me rreziqet e shkaktuara dhe në rrethanat aktuale për parandalimin e COVID-19. Këto masa nuk paraqesin obligimin e detyrueshëm për vaksinim,” tha Vitia duke shtuar se në të ardhmen nuk përjashtohen masa më rigoroze.

Vitia: Mbi 80 % e rasteve të reja me variantin “Delta”

Ministri i Shëndetësisë, Arben Vitia, tha se mbi 80 për qind e rasteve të reja janë me variantin “Delta” të COVID-19.

Pas mbledhjes së qeverisë, ku u ndërmorën masat e reja, Vitia tha masat e reja janë marrë duke konsultuar me të gjitha grupet e interesit.

Secili rekomandim që vjen nga ekspertët, tha ai, mund të ketë ndryshime, qoftë me masa shtesë, ani pse vendimi vlen deri më 10 shtator.

Krahas kësaj, ai bëri thirrje për vaksinim kundër COVID-19.