Vendimi, Ministria e Arsimit: Viti i ri shkollor fillon më 27 Shtator! Kushi: Më 1 Shtator…

Ministrja e Arsimit, Evis Kushi, ka bërë të ditur sot se është shtyrë nisja e vitit të ri shkollor 2021-2022. Kështu ky vit shkollor nuk do të nisë më 13 shtator, por më 27 shtator 2021.

Nisja e vitit shkollor është shtyrë për shkak se është vendosur që të zgjatet periudha e mësimit plotësues, sqaroi ministrja e Arsimit, duke saktësuar se gjatë periudhës së mësimit plotësues, që nis që më 1 shtator, nxënësit nuk janë të detyruar të shkojnë çdo ditë në shkollë.

“Duke vlerësuar dhe shqyrtuar me kujdes shqetësimet dhe sugjerimet e ardhura nga mësuesit dhe prindërit, vendosëm të zgjasim periudhën e mësimit plotësues deri në nisjen e vitit të ri shkollor, jo më 13 shtator, por më 27 shtator 2021. Gjatë periudhës së mësimit plotësues, që nis që më 1 shtator, nxënësit nuk janë të detyruar të shkojnë çdo ditë në shkollë, ndërsa mësuesit dhe të gjitha stafet shkollore do të jenë aty me kohë të plotë për të ofruar krahas mësimit plotësues, edhe veprimtari të ndryshme sportive, artistike dhe kulturore. Faleminderit dhe suksese të gjithëve!”, tha ministrja e Arsimit, Evis Kushi.