Vendimi për gjyqtaren Kosova më 18 korrik, ja hetimi pasuror dhe vlerësimi nga DSIK

Vendimi i KPK për Nertina Kosovën, gjyqtare e Gjykatës së Apelit për Krime të Rënda dhe kandidate për Këshillin e Lartë Gjyqësor do te njoftohet me datën 18 korrik.

Ajo u përball me Komisionin e Pavarur të Kualifikimit, i cili drejtohet në këtë proces nga Firdes Shuli, Roland Ilia dhe Olsi Komici.

Gjyqtarja ishte e pranishme në seancë pa avokat. Sipas relatorit Olsi Komici, ILDKPKI ka sjellë raport pozitiv për gjyqtaren. Po kështu KPK ka kryer hetim për pasuritë: apartament banimi në “Don Bosko” blerë per 6 mln lekë, me kredi 5 mln leke dhe shumën 1 mln lekë kursime.

Subjektit i është kerkuar të provojë burimet për kursimet 1 mln lekë. Ajo ka shpjeguar se jetonte me prindërit dhe e ka blerë me kursime të përbashkëta. Sipas retalorit, subjekti ka patur burime të mjaftueshme për kursimet.

Gjyqtarja ka depozitë bankare 1 mln lekë; limit overdraft 75 mijë lekë. Në këtë llogari kanë kaluar pagat dhe shpërblimet. Sipas relatorit, subjekti ka qenë i saktë me deklarimet e saj për likuditetet.

Sipas DSIK, Kosova është e përshtatshme për detyren. Vetë gjyqtarja ka kërkuar rikonfirmimin në detyrë. Vendimi për të do të merret me datën 18 korrik.

Kosova është emëruar si anëtare e Gjykatës së Apelit për Krime të Rënda në korrik 2014. Më parë, ajo ka punuar si gjyqtare në gjykatën e shkallës së parë për Krime të Rënda si dhe një kohë të shkurtër në Gjykatën e Elbasanit.