Vendimi, SPAK nuk e do Sali Berishën as në Parlament!
Kur Ish-Ministri i Brendshëm, Saimir Tahiri, po hetohej për trafik ndërkombëtar droge dhe organizim të grupit të strukturuar kriminal nuk iu ndalua prillin e vitit 2018 të kthehet pas 6 muajsh në seancë parlamentare, të gjithë e përqeshnin Ish-Kryeministrin Sali Berisha i cili po fotografonte këtë fenomen drejtësie me një trafikant droge!
Sot, kur Sali Berisha gjithashtu është nën hetim por nuk është pjesë e Partisë Socialiste, atij Prokuroria e Posaçme i refuzon kërkesën për të marrë pjesë në seancat plenare.
“Personi nën hetim Sali Berisha(i përfaqësuar nga mbrojtësit e tij Sokol Mëngjesi dhe Genci Gjokutaj) ka depozituar në datën 15.01.2024 një kërkesë me anën e së cilës kërkonte lejimin e tij për të marrë pjesë në seancat plenare të Kuvendit, në cilësinë e deputetit. Pasi janë njohur me përmbajtjen e kësaj kërkese, me vendimin e datës 18.01.2024 Prokurorët kanë vendosur mospranimin e saj,” thekson SPAK duke i plotësuar edhe këtë dëshirë Kryeministrit Edi Rama i cili është i shqetësuar me Sali Berishën edhe pasi u vu nën masën “arrest shtëpie”!
Ndryshe, ky vendim i SPAK-ut përkatësisht Edi Ramës vjen pas kërkesës së Ish-Kryeministrit Sali Berisha për të marrë pjesë në Parlament me arsyetimin se si deputet i zgjedhur nga sovrani, është e domosdoshme që të ushtrojë funksionet e tij si Deputet i Parlamentit të Shqipërisë.
“Në kushtet kur Sali Berisha është deputet i Kuvendit, i zgjedhur nga sovrani, është e domosdoshme që të ushtrojë funksionet e tij si Deputet i Kuvendit. Për këtë arsye duke qënë se ju jeni organ procedues, kërkojmë nga ana juaj miratimin dhe dhënien e lejes që z. Berisha në mënyrën dhe kohën që është absolutisht e domosdoshme të shkojë, të marrë pjesë dhe të ushtrojë funksionet e tij në seancat plenare të Kuvendit në përmbushje të të drejtave lirive politike të parashikuara nga Kushtetuta e vendit, por edhe të përmbushë detyrimet e veta kundrejt elektoratit që e ka zgjedhur,“ thuhej në kërkesë.
