Vendkalimi Jarinje, sekuestrohen 35 mijë euro

Me qëllim të luftimit dhe parandalimit të kontrabandës në bashkëpunim në mes të Doganës dhe Policisë së Kosovës është zhvilluar një plan operativ i koduar “Luftimi kontrabandës” në vendkalimin kufitar Jarinje, ku gjatë kontrollit të një automjeti me targa të Serbisë të cilin e drejtonte një qytetar i Kosovës janë zbuluar mjete monetare të padeklaruara në shumën prej 34.720 euro.

Për shkak të dyshimit të bazuar dhe informatave të siguruara përmes rrugëve operative, automjeti në fjalë ishte selektuar për kontroll në vijën e dytë ku i është bërë kontrolli detajuar nga zyrtarët doganorë dhe policorë. 

Pas zbulimit të 34.720 eurove, rasti në fjalë është trajtuar nga hetuesia e doganës dhe Prokurori i Prokurorisë Speciale të Kosovës. 

“Bazuar në nenin 33 paragrafi 5 i ligjit 05/L-096 (Ligji per pastrimin e parave dhe luftimin e financimit te terrorizmit), palës i janë konfiskuar 25% apo 8,680 euro e mjeteve të padeklaruara, ndërsa 75% apo 26,040 euro të mjeteve janë ndaluar me urdhër të Prokurorit për hetime të mëtutjeshme,” njoftoi Dogana e Kosovës.