Vendos Ti!

nga Agim Popoci

Pas një fushate zgjedhore të shkurt që nuk ofroi asgjë, tre kandidatët kryesor për postin e kryeministrit, Albin Kurti, Kadri Veseli dhe Vjosa Osmanin futen në garën e 6 Tetorit me një optimizëm të çuditshëm.

Me një fushatë primitive, pa e analizuar fare rezultatin e zgjedhjeve të kaluara, ku si Dialogu me Serbinë ashtu dhe kufiri me Malin e Zi nuk ndikuan fare në rezultat, sikur se dhe vota e mërgimtarëve, kandidatët për Kryeministër futen në garë pa një alternativë konkrete për ti dhënë përgjigje 59 % të votuesve që nuk dolën në zgjedhjen e fundit të viti 2017, dhe pa i dhënë një ofertë të qartë 111 mijë votuesve që votojnë për herë të parë ndonëse këta e vendosin fituesin!

Zgjedhjet e pakuptimta të vitit 2017 që u bënë në emër të “shitjes së tokës së Kosovës”  prodhuan një Kryeministër që ishte kundër Marrëveshjes për përcaktimin e vijës së kufirit me Malin e Zi, Ramush Haradinajn, dhe i cili e shiti tokën pasi erdhi në fronin e Isa Mustafës, pikërisht me këto akuza.

Por, lideri i PDK-së, Kadri Veseli, që ishte në koalicion me Isa Mustafën dhe vazhdoi edhe pas vitit 2017 me Ramush Haradinajn, falë vendimit të vendimit të Gjykatës Kushtetuese, që të jetë lider i koalicionit qeverisës, ishte pro Marrëveshjes, nuk pësoi rënie madje i shtoi plotë 75 mijë vota; Nga 54.872 sa kishte në zgjedhjet e vitit 2014, Kadri Veseli mori 129.947 vota në zgjedhjet e vitit 2017.

Dhe, rënie të votave nuk pësoi as Vjosa Osmani që si deputete ishte pro Marrëveshjes së kufirit dhe nga 39.911 sa kishte në vitin 2014, në zgjedhje e parakohshme të vitit 2017 mori 64.147.

A duhet të ishte i kënaqur lideri i Lëvizjes Vetëvendosje nga shtimi enorm i votave në krahasim me zgjedhjet e vitit 2014?!

Pse nuk u analizua kjo ecuri e procesit zgjedhor nga hyrja e Lëvizje s Vetëvendosje në Parlamentin e Kosovës deri më sot, nuk është e qartë, por fakti që Albin Kurti ishte kundër Marrëveshjes me kufirin me Malin e Zi dhe nga 63.602 vota sa kishte në vitin 2014, mori 143.621 vota në vitin 2017, nuk e bëjnë fitues të sigurt!

Në emër të ruajtjes së tokës së Kosovës, Albin Kurti shtoi vetëm 5000 vota më shumë se Kadri Veseli! Ndërkohë pjesëmarrja në zgjedhje u ul nga 42.63 % në 41.3 %, ose shprehur në vota, nga 734.055 sa votuan në vitin 2014, në 747.228  vota në vitin 2017. Por këtu fle një lepur jo i vogël!

Në vitin 2014 ishin 731.248 vota të vlefshme ndërsa në vitin 2017, 727.986; Nga 30.725 vota të pavlefshme sa ishin në vitin 2014, në vitin 2017, kur frika ishte e madhe për shkak të kauzës së madhe të “tokës së Kosovës”, dolën 42.554 vota të pavlefshme, ose 11.829 më shumë, për të cilat në fushatë nuk i është kushtuar asnjë sekondë nga ata që pretendojnë ti marrin fronin Kadri Veselit!

Nëse Kadri Veseli ishte i penalizuar nga fakti që drejton një parti të konsumuar politikisht dhe lufta kundër korrupsionit si kauzë kryesore mund ta penalizoj ndonëse ka një listë shumë reformuese me të cilën kandidon, por as Albin Kurti dhe as Vjosa Osmani nuk mund të ndihen komod me kapitalin më të madh që kanë, personalitetin politik të panjollosur deri më sot dhe sondazhet që i nxjerrin ato si dy parti kryesore fituese, LDK përkatësisht Vetëvendosje.

Aryset janë dy dhe shumë të rëndësishme!

Në zgjedhjet e vitit 2017, në zgjedhje nuk kanë dalë 58.7 % të qytetarëve me të drejtë vote, që janë të pakënaqur me klasën politike që e degradoi Parlamentin dhe shtetin e Kosovës. Për këtë grup shumë të rëndësishëm elektoral nuk u mor njeri ndonëse ky mund të jetë dhe fondi i votuesve që përcakton fituesin. Arsyet që ata të dalin më 6 Tetor janë shumë të vogla sepse kemi të bëjmë me një pjesë të votuesve që në zgjedhjet e kaluara kishin shumë më shumë arsye dhe pjesëmarrja pësoi rënie.

Votuesit e rinj! Ky fond i votave në zgjedhjet e 6 Tetorit mund të jetë dhe vendimtari, duke pasur parasysh se kemi të bëjmë me 111.733 votues, 87.180 prej të cilëve pas zgjedhjeve lokale të 2017 kanë arritur moshën 18 vjeçare, dhe 24.553 votues që nuk kanë qenë në Listën Përfundimtare të Votuesve në Zgjedhjet Lokale të 2017-ës.

Pra, ai nuk fshihet dhe nuk është me pikëpyetje si 58.7 % të qytetarëve që kanë shumë pakënaqësi, janë me hamendësime dhe nuk e shohin të arsyeshme të votojnë!

Është e vërtetë se Lëvizja Vetëvendosje me Albin Kurtin janë të favorizuar më shumë në këtë prurje të votave, kur dihet që kemi të bëjmë me partinë me anëtarësinë më të re në Kosovë, por nuk është e qartë pse fushata e kësaj partie u përqendrua në denigrimin e Vjosa Osmanit dhe jo në trajtimin më serioz të kësaj prurje, që përfundimisht do ta vulos Kryeministrin e ri të Kosovës.

Kështu, me një politikë me parti nga më të ndryshmet, që krenohen me taksën ndaj Serbisë dhe shesin tokën kosovare, janë kundër taksës dhe nuk e shesin tokën kosovare, e duan votën e të rinjve dhe nuk u japin mundësi madje as që të jenë pjesë e zgjidhjes, sot, 12 vjet pas shpalljes së Pavarësisë së Kosovës, zgjedhja e Qeverisë së Kosovës varet nga ata që ishin vetëm 6 vjeç, në këtë ditë të madhe të historisë së kombit shqiptar.

Sot, Ti që je 18 vjeç dhe i drejtohesh kutisë së votimit për herë të parë, të kanë ngarkuar shumë mbi shpatulla. Por, si gjithmonë në historinë e shtetit të Kosovës, ku përgjegjësitë i morën të rinjtë, ashtu do të ndodhë  edhe më 6 Tetor, VENDOS TI!