Vendosja e Shkodrës në një sistem kamerash, Berisha: Dëshmi flagrante e fuqisë së mafias!

Pas ç’montimit të 21 kamerave të vendosura në shtylla elektrike nga grupe kriminale për të ndjekur lëvizjet e policisë në Shkodër, Kryatri i Partisë Demokratike, Sali Berisha, duke akuzuar Kryeministrin Edi Rama si përgjegjësin kryesor për mosfunksionim të shtetit, tha se qytetarët janë vendosur në Syrin e Ciklopit ndërsa policia bën rolin e bashkëpunëtorit.

“Mafia është ajo që sundon kudo. Krimi është ai që vendos. Ai ka bajlozët e tij, të përfaqësuar me Edi Ramën në qeveri. Krimi ka përfaqësues në parlament me Ballën e Gjiknurin. Krimi ka përfaqësues Erion Veliajn në Bashkinë e Tiranës. Krimi vendos kudo.

Njëlloj si në narko-shtetet më të konsoliduara në histori, në Amerikën Latine, rrugët, sheshet e qyteteve tona janë të vendosura tërësisht, në çdo metër katror në kontrollin e syrit të ciklopit,” tha Sali Berisha duke folur për rastin e Shkodrës ndërsa vlerësoi se i kontrolluar në këtë mënyrë është i gjithë territori shqiptar:

“Kamerat e vendosura nga organizatat kriminale, të cilat bashkëpunojnë ngushtë me segmentet e tyre në polici dhe institucionet e tjera.

Vendosja e Shkodrës në një sistem kamerash të specializuara nga organizatat kriminale, është dëshmia më flagrante e gjithë fuqisë së mafias në këtë vend.

Mendoni ju se është vetëm Shkodra? Absolutisht jo. Është çdo pjesë e këtij territori. Shkoni në Vlorë, nisuni në Elbasan, në Korçë, kudo jeni të filmuar.”