Vepra dhe jo premtime të Ramës, Basha: Garantojmë, 1200 € për mjekët dhe 700 € për infermierët!

Pas spektaklit që dhuroi Kryeministri Edi Rama para mjekëve dhe infermierëve të Spitalit Infektiv ku premtoi rritje të konsiderueshme të pagave duke filluar nga viti 2021, ka reaguar Kryetari i Partisë Demokratike, Lulzim Basha, duke thekusar se atyre ju detyrohemi vepra dhe jo premtime te pambajtuara ndërsa saktësoi se sipas Planit të PD, paga për mjekët do të jetë 1200 euro ndërsa 700 euro për infermierët.

“Mjekët dhe infermierët tanë kanë nevojë për mbështetje dhe mbrojtje të veçantë nga shteti për shërbimin kolosal që i kanë bërë vendit, në veçanti në këto kohë pandemie. Rritja e pagave të tyre është jetike por ajo duhet të jetë reale dhe jo elektorale,” tha Lulzim Basha duke shtuar se Shqipëria i ka të gjitha mundësitë për ta trajtuar me dinjitet personelin shëndetësor.

“Por kjo është e pamundur sa kohë që kemi një qeveri që i çon paratë e taksave të shqiptarëve tek koncesionet korruptive, dhe shpenzimet për shëndetin publik janë më të ulëtat në rajon,” tha Kryetari i Partisë Demokratike duke reaguar përmes rrjetit social Facebook ndërsa vlerësoi se kjo qeveri është treguar mosmirënjohëse me mjekët dhe infermierët edhe gjatë pandemisë.

“Pa asnjë vonesë tjetër, qeveria Rama duhet t’u japë atyre shpërblimin e premtuar prej 1000 euro. Stafet mjekësore janë profesioni më jetik i vendit. Atyre ju detyrohemi vepra dhe jo premtime te pambajtuara.”

Duke u zotuar se me ardhjen në pushtet do të anulohen koncesionet korruptive dhe paratë do të përdoren për mbështetje reale për mjekët dhe infermierët, me rritje pagash, me pajisje dhe kushte më të mira për tju shërbyer qytetarëve, Kryetari i Partisë Demokratike, Lulzim Basha, në fund garantoi:

“Me planin tonë ne do të mundësojmë ndryshimin e madh në shëndetësi me paga dinjitoze të niveleve rajonale për ta: 1200 euro për mjekët dhe 700 euro për infermierët.”