Veri, aksion i policisë së Kosovës, 5 të arrestuar. Gjuriç alarmon serbët. Ja detajet…

Njësitë e Policisë së Kosovës mëngjesin e sotëm kanë ndërmarrë një aksion në katër komunat veriore të vendit me shumicë serbe.

Mësohet se janë arrestuar të paktën pesë persona me dyshimin për krim të organizuar dhe persona që lidhen me vrasjen e policit Enver Zymberi dhe atë të ish-politikanit serb Oliver Ivanoviç.

Operacioni ka nisur pak pas orës 05:00 të mëngjesit ndërsa alarmi që përdoret nga serbët e veriut e që simbolizon tubim të menjëhershëm është aktivizuar rreth orës 06:00, por qytetarët nuk janë tubuar deri sa në televizionin publik nuk është paraqitur Drejtori i Zyrës për Kosovën pranë Qeverisë së Serbisë, Marko Gjuriç, i cili i ka informuar se Presidenti i Serbisë ka ngritë nivelin e gatishmërisë së Ushtrisë së Serbisë për luftë.

Ndërkohë Policia e Kosovës ka bërë të ditur se Njësia Speciale e Policisë së Kosovës është duke zhvilluar një aksion në veri të Mitrovicës me qëllim arrestimin e disa zyrtarëve policorë dhe qytetarë që dyshohen për “Pjesëmarrje ose Organizim i Grupit Kriminal”, në lidhje me veprat tjera penale si; “Kontrabandim me Mallra”, “Keqpërdorim i Pozitës Zyrtare”,“Dhënie e Ryshfetit”, “Tregti e Ndaluar”.

Gjatë realizimit të këtij aksioni, Policia e Kosovës thekson se kishte edhe rezistencë të armatosur.

Njoftimi i Policisë së Kosovës:

Sot, me 28.05.2019 Policia e Kosovës (PK), në bashkëpunim me Inspektoratin Policor të Kosovës (IPK), si dhe nën asistimin e njësiteve tjera relevante në zbatim të urdhëresës së Gjykatës Themelore Prishtinë, po realizohet një operacion i cili ka rezultuar me ndalimin  e disa zyrtarëve policor dhe disa qytetarëve.

Këtij operacioni policor i ka paraprirë një hetim disa mujor i IPK-së, PK-së i udhëhequr nga Prokuroria Speciale e Kosovës, i cili ka rezultuar me dyshimin e bazuar të përfshirjes së disa zyrtareve policor dhe të disa qytetarëve në; “Pjesëmarrje ose Organizim i Grupit Kriminal”, në lidhje me veprat tjera penale si; “Kontrabandim me Mallra”, “Keqpërdorim i Pozitës Zyrtare”, “Dhënie e Ryshfetit”, “Tregti e Ndaluar” etj.

Edhe përkundër hasjes në rezistencë të armatosur në Veri të Mitrovicës, operacioni policor është duke vazhduar,  përfshirë arrestimin dhe kontrollin e disa lokacioneve të cilat kanë rezultuar me konfiskimin e dëshmive relevante përfshirë edhe armë të gjata.

Policia e Kosovës, në bashkëpunim me organet e drejtësisë, Inspektoratin Policor mbeten të përkushtuara në realizimin e detyrave dhe përgjegjësive të saj ligjore, me qëllim të ruajtjes së rendit dhe qetësisë publike, parandalimit të veprimtarive të kundërligjshme, pa marrë parasysh përfshirjen e personave  në raste të tilla penale.

Lidhur me detajet rreth realizimit të këtij operacioni të gjerë do të njoftoheni, në një konferencë të përbashkët ku pritet të marrin pjesë Prokuroria, Policia dhe IPK-ja