Verifikimi i kontabilistëve, BMP: Nga 2300, vetëm 309 kalojnë procesin. Ja lista…

Bordi i Mbikëqyrës Publike, BMP, ka njoftuar përfundimin e verifikimit të veprimtarisë së Kontabilistëve të Miratuar (#KM) që ushtrojnë profesionin të organizuar si persona fizikë ose si persona juridikë. Sipas njoftimit të Bordit, nga 2300 zotërues titulli dhe qindra subjekte juridike që ofronin shërbime kontabiliteti, vetëm 309 e kanë kaluar procesin.

Bordi ka publikuar dhe listën e 309 subjekteve (lista në fund). Ky verifikim konsiderohet si një nga reformat më të rëndësishme në formalizimin e ekonomisë dhe do të mundësojë krijimin e regjistrave publikë të kontabilistëve të miratuar, që do të jenë të vetmit që do të kenë të drejtë të ofrojnë shërbimet e kontabilistëve të miratuar.

Sipas njoftimit, ky proces do të bëjë të mundur formalizimin e profesionit të kontabilistit të miratuar, duke garantuar zbatimin e dispozitave ligjore, në lidhje me detyrimet që përfshijnë zbatimin e standardeve etike dhe kërkesave të tjera në zbatim të akteve ligjore e nënligjore.

Konkretisht, ky verifikim konsistoi në lidhje me ?

-Rregullsinë e dokumentacionit ligjor

-Regjistrimin në një Organizatë Profesionale pas marrjes së titullit KM

-Marrëdhëniet e punës

-Angazhimin përgjatë 5 viteve të fundit

-Pajtueshmërinë me dispozitat ligjore në fuqi

-Kryerjen e edukimit të vijueshëm

-Verifikimin e dosjes personale të lidhura me çështjet gjyqësore dhe dëshminë e penalitetit.

“Finalizimi i këtij procesi është krijimi, hartimi dhe publikimi i regjistrave publikë të kontabilistëve të miratuar, të cilët do të jenë lehtësisht të aksesueshëm nga të gjitha palët e interesuara, duke garantuar ndër të tjera, që shërbimi i kontabilistëve të miratuar të mos ofrohet nga individë apo subjekte të tjerë të palicencuar, apo që konkurrojnë në mënyrë të padrejtë me ushtruesit e rregullt të profesionit.

Në këtë kuadër, BMP ka dërguar listat pranë secilës prej shoqatave që kanë sjellë dokumentacionin për anëtarët, që kanë kaluar procesin, përfshirë edhe anëtarët që nuk e ushtrojnë apo që nuk kryejnë aktivitet në kuptimin e ligjit për shoqëritë tregtare, duke detajuar edhe ata zotërues titulli që kanë detyrimin për të përmbushur orët e edukimit të vijueshëm.

Bashkangjitur do të gjeni #listën e të gjithë KM që ushtrojnë veprimtarinë e tyre si person fizik ose jurdik, ndërkohë pranë shoqatave janë përcjellë regjistrat me rezultatet e përftuara në lidhje me anëtarët e organizatës, të ndarë specifikisht në:

1. Regjistri i subjekteve persona fizikë dhe shoqëri kontabiliteti që përmbushin kriteret ligjore;
2. Regjistri i subjekteve të cilët nuk e ushtrojnë profesionin si person fizik ose nëpërmjet shoqërisë së kontabilitetit dhe që përmbushin kriteret ligjore;
3. Regjistri i subjekteve të verifikuara mbi përmbushjen e detyrimit të edukimit të vjiueshëm për periudhën 2014-2019.

Si përfundim, theksojmë se në bazë të rregullores së sipërcituar, organizatat profesionale të kontabilistëve të miratuar janë #përgjegjëse për mbajtjen dhe përditësimin e regjistrit publik të kontabilistëve të miratuar dhe shoqërive të kontabilitetit, si dhe identifikimin e kontabilistëve të miratuar dhe të shoqërisë së kontabilitetit në regjistrin publik, me një numër individual. Gjithashtu, organizata profesionale përkatëse, pasi është njohur nga #BMP me vendim përkatës në përputhje me rregulloren numër 9 të sipërcituar, pajis kontabilistët, të cilët kanë plotësuar të gjitha kriteret për të fituar titullin KM, me “Kartën e KM” që dëshmon të drejtën e kontabilistit të miratuar aktiv për ushtrimin e profesionit si profesionist i lirë për periudhën në vijim.

Gjithashtu, informacioni për regjistrimin mbahet në format elektronik dhe vihet në dispozicion të publikut nëpërmjet publikimit në faqen zyrtare të organizatave profesionale të kontabilistëve të miratuar të njohura nga BMP. Në këtë kuadër, BMP #publikon listën e organizatave profesionale të kontabilistëve të miratuar të njohura prej tij në faqen zyrtare dhe do ta përditësojë atë vazhdimisht për çdo ndryshim të mundshëm.

Të gjithë ato subjekte që kërkojnë të përfshihen në këtë proces e që nuk kanë mundur të dorëzojnë dokumentacionin apo të aplikojnë brenda afateve, në mbështetje të rregullores nr.9 duhet të bëjnë një kërkesë me shkrim pranë BMP ose organizatës profesionale pranë së cilës janë të anëtarësuar, me qëllim që BMP të marrë në shqyrtim rastin dhe brenda një periudhe 3 mujore vendos nisjen e procesit të verifikimit sipas dispozitave te kësaj rregullore.

Të gjitha subjektet të cilat përgjatë procesit kalojnë në statusin pasiv duke u tërhequr përkohësisht nga ushtrimi i profesionit apo që deri në momentin e kryerjes së procesit të verifikimit nuk kanë qenë ushtrues të profesionit janë të detyruar të kalojnë në proces verifikimi sikurse të gjitha subjektet e parashikuara në këtë rregullore përpara se të regjistrohen në regjistrin publik për të vijuar më pas me ushtrimin e aktivitetit.

BMP është duke planifikuar organizimin e një eventi (në varësi edhe të kushteve të situatës së pandemisë) duke konsideruar përfshirjen e të gjitha institucioneve shtetërore si dhe dhomave të tregtisë për sensibilizimin e rolit të cilësisë së raportimit financiar, përgjegjësive të KM-ve dhe kërkesave përkatëse ligjore që prekin veprimtarinë e KM” thuhet në njoftimin zyrtar./Monitor/

Lista: