Veriu i Kosovës, Ministri i Brendshëm: Mekanizmi terrorist i Serbisë po çmontohet

Mekanizmi terrorist i Serbisë në veri të Republikës së Kosovës po çmontohet çdo ditë e më shumë, tha sot Ministri i Brendshëm i Kosovës, Xhelal Sveçla, duke bërë të ditur se në veri janë gjetur dhjetëra uniforma të policisë së rregullt dhe dorcave soeciale serbe.

“Pas informatave inteligjente, në një shtëpi në fshatin Isev i Poshtëm në Komunën e Leposaviçit u gjetën dhjetëra uniforma të policisë se rregullt dhe asaj speciale serbe si dhe pjesë të uniformave të Policisë së Kosovës.

Kjo është edhe një dëshmi e radhës se mekanizmat e sigurisë së Serbisë ishin dhe mbeten përgjegjësi i tentativës për destabilizim dhe aneksim të veriut të vendit tonë,” tha Xhelal Sveçla në reagimin e tij përmes rrjetit social Facebook duke saktësuar se falë vigjilencës dhe punës së pakursyer të të gjitha institucioneve të sigurisë së Kosovës. kjo tentativë e Serbisë për destabilizim të vendit suksesshëm po parandalohet dhe luftohet ndërsa përfundoi:

“Është detyrë dhe obligim i yni shërbimi ndaj të gjithë qytetarëve pa asnjë dallim, ndërkohë që është përkushtimi dhe vendosmëria jonë që me të gjitha mjetet ligjore të mbrojmë sovranitetin dhe integritetin territorial të vendit tonë. Të gjitha elementet terroriste që tentojnë destabilizim do të shkatërrohen pa kursim e përgjithmonë.”