Veriu i Kosovës, serbët protestojnë kundër ultimatumeve dhe japin ultimatume

Në fshatin Rudare të komunës Zveçan, qytetarët serbë protestojnë kundër, siç thanë, “kërcënimeve” të kryeministrit të Kosovës, Albin Kurti. Në këtë vend, i cili në mesin e komunitetin lokal serb njihet edhe si “Te kryqi”, ndodhet një prej barrikadave të ngritura në veri të Kosovës qysh më 10 dhjetor.

Policia e Kosovës, nëpërmjet një komunikate për media, i ftoi qytetarët që “të kenë vëmendje dhe kujdes të shtuar” gjatë protestës.

Ashtu siç paralajmëruan, të mbledhurit në protestë po kundërshtojnë “ultimatumet dhe afatet” për heqjen e barrikadave.

Nga 10 dhjetori, grupe të serbëve në veri të Kosovës kanë ngritur barrikada në rrugët që çojnë drejt vendkalimeve kufitare me Serbinë, Jarinjë dhe Bërnjak.

Me këtë veprim, raporton RFE, ata i janë përgjigjur arrestimit të ish-policit serb, Dejan Pantiç, i dyshuar për një sulm kundër zyrtarëve të Komisionit Qendror të Zgjedhjeve në veri.

Për heqjen e barrikadave, ata kërkojnë lirimin e Pantiqit.

Ndryshe, në një intervistë për The Guardian, kryeministri i Kosovës, Albin Kurti, tha më 20 dhjetor se është pajtuar që t’iu japë kohë trupave të misionit të NATO-s në Kosovë, KFOR, që të heqin barrikadat, por barrikadat nuk mund të lejohen që të qëndrojnë për një kohë të gjatë.

“Shqetësimi ynë është se heqja e këtyre barrikadave nuk përjashton mundësinë e viktimave. Prandaj, ne duam që të jemi shumë të kujdesshëm që të sigurohemi që të mos ketë destabilizim dhe do të ketë paqe dhe siguri. Megjithatë, ne nuk mund të lejojmë këtë shkelje të ligjshmërisë dhe kushtetutshmërisë që të vazhdojë në pafundësi. Prandaj, po, kjo duhet të përfundojë, sa më shpejt aq më mirë”.

Por kujdesin e shtuar të Kryeministrit Albin Kurti, krimineli Goran Rakiç që dha dorëheqje nga posti i kryetarit të komunës Mitrovicë Veri e cilësoi si sugjerim për vrasjen e serbëve në barrikada:

“Deklarata e fundit e Albin Kurtit ka kaluar çdo masë. Kurti haptazi ka sugjeruar vrasjen e serbëve në barrikada, sepse sipas tij, barrikadat nuk mund të hiqen ndryshe. Ai po bën thirrje për vrasjen e nënave tona, motrave tona, punëtorëve doktorëve dhe profesorëve që luftojnë ditë e natë dhe në mënyrë paqësore kundër terrorit të tij. Fatkeqësisht, ky kërcënim po kalon pa përgjigje nga përfaqësuesit ndërkombëtar, që është e papranueshme.”