Veriu pas trazirave

Në Mitrovicë të Veriut dhe Zveçan, një ditë pas protestave dhe barrikadave, situata është e qetë. Barrikadat janë tërhequr dhe qytetarët mund të lëvizin lirshëm në rrugët e këtyre dy komunave të banuar me shumicë serbe. Megjithatë, shenjat e dhunës janë ende të dukshme në rrugë, dje qytetarët serbë protestuan ndaj një aksioni të Policisë dhe Doganës së Kosovës kundër kontrabandës së mallrave.

Në protestat që pasuan këtë aksion u lënduan dhjetë policë dhe dhjetë qytetarë të kësaj komune kërkuan ndihmë mjekësore. Ndërkaq, nën dyshimet për kontrabandë janë arrestuar tetë persona, shumica prej të cilëve shqiptarë. RFE sjell disa foto të shkrepura sot më 14 tetor në Mitrovicë të Veriut dhe Zveçan për të dëshmuar situatën që mbretëron.

Në rrugën pranë kësaj pika të karburantit në Zveçan, shenjat e dhunës janë ende të dukshme. Qytetarët e kësaj komune, më 13 tetor protestuan kundër një aksioni të zhvilluar nga autoritetet e Kosovës, kundër kontrabandës. Policia e Kosovës tha se protestuesit kishin përdorur bomba zhurmuese, bomba dore, mjete piroteknike e gjëra të forta, gjatë protestës së tyre. 

Kjo rrugë në afërsi të “Lagjes së Bosnjakëve” në Mitrovicë të Veriut më 13 tetor u bllokua nga disa kamionë, që vendosën banorët lokalë. Kjo rrugë është një prej rrugëve që lidh pjesën verirore dhe jugore të Mitrovicës. 

Autoritetet në Kosovë thanë se operacioni i 13 tetorit nuk ishte i drejtuar kundër nacionaliteti, duke potencuar që shumica e të arrestuarve janë shqiptarë. Por, serbët në Mitrovicë të Veriut më 13 tetor e kundërshtuan këtë vendim dhe në përleshjet mes policisë dhe protestueve, sipas autoriteteve shëndetësore, në këtë komunë ndihmë mjekësore kërkuan ndihmë dhjetë persona.

Aksioni i Policisë dhe Doganës së Kosovës u zhvillua edhe në Zveçan. Edhe në këtë komunë, qytetarët protestuan kundër këtij aksioni.

Në Mitrovicën e Veriut, barrikadat e vendosura nga banorët, që bllokonin qarkullimin në këtë komunë të banuar me shumicë serbe, u hoqën në orët e vona të 13 tetorit.

Doganat e Kosovës i kanë thënë Radios Evropa e Lirë se kontrabandë me mallra ka në tërë vijën kufitare të Kosovës, por ky fenomen është më prezentë në komunat në veri të Kosovës.

Barrikadat në magjistralen Prishtinë-Rashkë, përkatësisht në Rudarë të Zveçanit, u hoqën në mbrëmjen e 13 tetorit./RFE/