Vermicë, kapen 266 kilogramë eksploziv, arrestohet drejtuesi i furgonit

Një sasi e madhe e materieve plasëse është zbuluar në pikën kufitare të Vermicës, gjatë kontrollit të detajuar të një furgoni me targa vendore.

Policia ndaloi automjetin që drejtohej nga një shtetas kosovar dhe gjatë inspektimit u gjetën dhe konfiskuan 266.58 kg eksploziv, disa detonatorë elektrikë, fitila emulex 800 gram, 20 fitila tjerë, 6 tuba me tela elektrikë.

Sipas njoftimit zyrtar, menjëherë është informuar prokurori kompetent, i cili ka urdhëruar arrestimin e të dyshuarit.

Ai është dërguar në mbajtje, ndërsa rasti është iniciuar si “ Import apo shitje e paautorizuar e materialeve plasëse”.

Prokurori, gjithashtu, ka urdhëruar procedurat e mëtejshme hetimore, përfshirë verifikimin e origjinës së materialeve dhe qëllimit të transportimit të tyre.