Vermicë, kapen 30 kg marijuanë. Mjegulla “shpëton” trafikantët

Policia kufitare e Kosovës sot ka kapur në Vermicë 30 kg drogë të llojit marijuanë ndërkohë për shkak të kushteve të vështira atmosferike dhe mjegullës së dendur trafikantët arritën ti shpëtojnë prangave të policisë

Stacioni Policor në mbikqyrje të kufirit në Vermicë, sonte rreth orës 19:00, gjatë kontrollit të vijës kufitare me Shqipërinë vërejti dy persona duke lëvizur në vijën e gjelbër. Udhëheqës i policisë kufitare, Nexhmi Krasniqi, tha se policia me këtë rast është vënë në ndjekje duke menduar se janë migrantë të paligjshëm.

“Mirëpo dy të dyshuar me këtë rast kanë hedhur dy çanta të mëdha në tokë dhe janë futur në territorin e Shqipërisë. Ne e kemi informuar policinë e Shqipërisë dhe ata e kanë zhvilluar një operacion të përbashkët, megjithatë kushtet e vështira atmosferike, mjegulla e dendur, ka ndikuar që të dyshuarit mos të kapen,” sqaroi Krasniqi.

Me këtë rast, sipas tij, janë kapur 30 kilogramë drogë e llojit marijuanë dhe me urdhër të prokurorit kujdestar droga është konfirmuar dhe janë kryer të gjitha procedurat ligjore.