Veseli premton më shumë hapësirë për bizneset

Kryetari i Partisë Demokratike të Kosovës dhe kandidati për kryeministër i PDK Kadri Veseli, gjatë vizitës në Qendrën Tregtare “Albi Mall” ku u prit nga pronari i saj Tahir Humolli tha se kjo Qendër Tregtare është e kompletuar dhe konkurruese me ato të metropoleve evropiane.

“Qendrat Tregtare në Kosovë janë të kompletuara dhe konkurruese me ato të metropoleve evropiane. Një e tillë është edhe “Albi Mall”, ku bashkë me pronarin Tahir Humolli vizituam disa biznese që operojnë aty dhe takuam qytetarë të shumtë. Kjo qendër dhe suksesi i saj dëshmojnë aftësitë e ndërmarrësve tanë, të cilët ecin me hapa të shpejtë përpara kur u jepet mundësia,” thekson Veseli përmes rrjetit social “Facebook” duke premtuar përkrahje për bizneset vendore në mënyrë që të ndërtohet një e ardhme më e mirë në shtetin e Kosovës.

“Në të ardhmen do të krijojmë sa më shumë hapësirë dhe mundësi që bizneset e tilla të zgjerohen dhe të punësojnë edhe më shumë të rinj. Po ashtu, prioritet kryesor për mua është mbështetja e sektorit të prodhimit, që këto qendra të mbushen me produkte vendore cilësore,” thekson Kadri Veseli duke përfunduar:

“Vetëm me një sektor privat të suksesshëm, ne mund ta ndërtojmë një të ardhme më të mirë në vendin tonë.”