Vetëdorëzohet Balili, Sandër Lleshaj: Operacioni me partnerët e Shqipërisë mundësoi dorëzimin…

Ministri i Brendshëm, Sandër Lleshaj duke konfirmuar arrestimin e Klement Balilit tha se Policia e Shtetit ka marrë sot një tjetër rezultat të merituar të një kapërcimi historik në mendësi dhe në aftësinë e saj goditëse.

“Policia shqiptare ka finalizuar sot një operacion të gjatë, të ndërlikuar dhe shumë të rëndësishëm, për dorëzimin e Klement Balilit, pas një procesi operativo-gjurmuese, në bashkëpunim me shërbimin sekret shqiptar dhe me partnerët tanë,” tha Lleshja duke bërë të ditur se operacioni për ndalimin e Balilit, u zhvillua në bashkëpunim me SHISH dhe partnerët ndërkombëtarë.

“Për këdo që njeh sadopak punën operative zhvilluese dhe natyrën e operacioneve të tilla për ndalimin e personave të këtij karakteri besoj do ta ketë të qartë që kurrë nuk mund të ketë një udhëtim  vullnetar të një personi të kriminalizuar dhe të këtij niveli drejt stacionit të policisë. Procesi është rezultat i një operacioni të gjerë, të thellë të ndërlikuar në bashkëpunim me partnerë të Shqipërisë të cilët kanë mundësuar që personi në fjalë të dorëzohet në Policinë e Shtetit,”tha Lleshaj ndërkohë I pyetur nga gazetarët për procesin ai ishte I prerë:

-Çfarë sigurie i ofruat atij që u vetëdorëzua?

-Sigurinë e një procesi të drejtë ligjor, tha Ministri i Brendshëm.

–Që do të thotë? shtuan gazetarët.

-Një proces i drejtë ligjor. Faleminderit! përfundoi Lleshaj.